Mumbai Local case : लोकलमध्ये तरुणीशी छेडछाड, नंतर रुळांवर ढकललं; मुलीला कायमचं अपंगत्त्व

नायगाव रेल्वे स्थानकामध्ये लोकल ट्रेनमध्ये एका 20 वर्षीय तरुणीची छेडछाड करून तिला रुळांवर ढकलून दिल्याचा धक्कादायक प्रकार समोर आला आहे. या घटनेत तरुणीचा डावा हात कोपरापासून कापला गेला असून, तिला कायमचे अपंगत्व आले आहे. 4 नोव्हेंबर रोजी भाईंदर ते नायगाव प्रवासादरम्यान ही दुर्दैवी घटना घडली.

लोकलमध्ये आरोपीने पीडित तरुणीसोबत गैरवर्तन केले, ज्याला तरुणीने विरोध करत चप्पल मारली. त्यानंतर आरोपीने तरुणीला लोकलच्या दोन डब्यांच्या मधून जोरदार धक्का दिला, ज्यामुळे ती रेल्वे रुळांवर पडली. त्याचवेळी लोकल सुरू झाल्याने तिचा डावा हात चाकाखाली आला. घटनेनंतर आरोपी गर्दीचा फायदा घेऊन फरार झाला होता, मात्र पोलिसांनी त्याला अटक केली आहे. या प्रकरणी मनसे विधानसभा प्रमुख सचिन पोकळे यांनी कुटुंबीयांसह रेल्वे पोलिसांची भेट घेतली. त्यांनी आरोपीवर योग्य आणि कठोर कलमे लावण्याची मागणी केली. पोलिसांनी सुरुवातीला लावलेल्या कलमांऐवजी कलम ३०७ आणि नवीन बीएनएस प्रमाणे १०९ हे कलम वाढवण्याचे आश्वासन दिले आहे. या घटनेमुळे महिला प्रवाशांच्या सुरक्षेचा प्रश्न गंभीर बनला आहे.