MNS : मुंबईच्या बाणगंगेत छठपूजेवरून वाद; मनसेचा तीव्र विरोध, आंदोलनाचा इशारा!

मुंबईतील ऐतिहासिक बाणगंगा परिसरात छठपूजेच्या आयोजनावरून महाराष्ट्र नवनिर्माण सेनेने (मनसे) तीव्र विरोध दर्शवला आहे. मनसे कार्यकर्त्यांनी छठपूजा होऊ देणार नाही अशी घोषणाबाजी करत आपला पवित्रा स्पष्ट केला आहे. या विरोधामागे अनेक कारणे मनसेने पुढे केली आहेत. गेल्या काही महिन्यांपूर्वी बाणगंगेतील मृत माशांच्या घटनेवरून पाणी प्रदूषणाचा मुद्दा समोर आला होता. या घटनेसाठी छठपूजेसारख्या विधींना मनसेने जबाबदार धरले आहे. हे त्यांचे सण आहेत, पण त्यांनी ते त्यांच्या-त्यांच्या राज्यात जाऊन करावेत, असे मनसेचे म्हणणे आहे.

मुंबई महानगरपालिकेच्या डी वॉर्डमध्ये सहायक आयुक्तांच्या उपस्थितीत छठपूजेच्या तयारीसाठी बैठक होणार आहे, मात्र मनसेने या बैठकीला आणि आयोजनालाच विरोध केला आहे. मनसेने प्रशासनावरही प्रश्नचिन्ह उपस्थित केले आहे, की हिंदूंच्या गणपती व देवी विसर्जनासाठी समुद्रात आणि तलावांमध्ये निर्बंध असताना छठपूजेला मात्र परवानगी का दिली जात आहे. मनसेचे विभाग अध्यक्ष दिनेश पुंड यांनी छठपूजा रोखण्यासाठी आंदोलन करण्याचा इशारा दिला आहे. सध्या बाणगंगा परिसरात पोलिसांचा मोठा बंदोबस्त तैनात असून, तणावपूर्ण शांतता आहे.