प्रेग्नंसीबाबत अखेर समंथाकडून खुलासा; म्हणाली “आता मला थोडा ब्रेक..”
अभिनेत्री समंथा रुथ प्रभू लग्नाच्या सहा महिन्यांनंतर गरोदर असून लवकरच ती आई होणार आहे. डिसेंबर 2025 मध्ये तिने निर्माता राज निदिमोरूशी लग्न केलं होतं. आता लवकरच हे दोघं आई-बाबा होणार आहेत.
दाक्षिणात्य चित्रपटसृष्टीतील सर्वांत लोकप्रिय अभिनेत्री समंथा रुथ प्रभूने अखेर तिच्या प्रेग्नंसीच्या बातम्यांवर शिक्कामोर्तब केला आहे. गेल्या काही दिवसांपासून सोशल मीडियावर तिच्या गरोदरपणाची चर्चा होती. अखेर आता तिनेच त्यावर मौन सोडत चाहत्यांना ‘गुड न्यूज’ दिली आहे. 39 वर्षीय समंथा लवकरच आई होणार आहे आणि पुढील काही दिवसांत मॅटर्निटी ब्रेक घेणार असल्याचंही तिने जाहीर केलं आहे. ‘मा इंटी बंगारम’ या चित्रपटाच्या यशानिमित्त आयोजित एका कार्यक्रमात समंथा माध्यमांशी बोलताना म्हणाली, “या चित्रपटानंतर आता मला थोडा ब्रेक घ्यावा लागेल, कारण माझी आताची स्थितीच तशी आहे. मला मॅटर्निटी लिव्ह घ्यावी लागेल. त्यानंतर मी माझ्या चाहत्यांसाठी नव्या चित्रपटासोबत परत येईन.”
समंथाच्या या वक्तव्यामुळे तिच्या प्रेग्नंसीबद्दलच्या सर्व चर्चांना पूर्णविराम मिळाला आहे. याआधी याच चित्रपटाच्या सक्सेस पार्टीदरम्यान समंथाचा बेबी बंप दिसला होता. तेव्हापासूनच तिच्या गरोदरपणाच्या चर्चांना उधाण आलं होतं. मिळालेल्या माहितीनुसार, समंथा सध्या गरोदरपणाच्या सुरुवातीच्या टप्प्यात, म्हणजेच पहिल्या तिमाहित आहे. ती आणि तिचा पती राज निदिमोरू हे या आनंदाच्या बातमीने खूपच खुश आहेत. समंथासुद्धा तिच्या आयुष्यातील या नव्या टप्प्याबद्दल अत्यंत उत्साहीत आहे. समंथाला नेहमीच आई होण्याची इच्छा होती आणि हा क्षण तिच्यासाठी खूप खास आहे. समंथाची प्रसूती डिसेंबर 2026 मध्ये अपेक्षित आहे.
समंथाचा व्हिडीओ-
‘मा इंटी बंगारम’ या चित्रपटाच्या दिग्दर्शिका नंदिनी रेड्डी यांनीही समंथाच्या गरोदरपणाबद्दल आनंद व्यक्त केला. “आमच्या चित्रपटाला मोठं यश मिळत असतानाच समंथाच्या आयुष्यात ही आनंदाची बातमी आली आहे”, असं त्या म्हणाल्या. समंथाने डिसेंबर 2025 मध्ये कोईंबतूर इथल्या ईशा योग केंद्रातील लिंग भैरवी मंदिरात निर्माता राज निदिमोरूशी लग्न केलं. ‘द फॅमिली मॅन 2’ या वेब सीरिजच्या शूटिंगदरम्यान या दोघांची भेट झाली होती.
समंथा आणि राज या दोघांचंही हे दुसरं लग्न आहे. समंथाने अभिनेता नाग चैतन्यशी पहिलं लग्न केलं होतं. मात्र लग्नाच्या चार वर्षांतच त्यांचा घटस्फोट झाला. या घटस्फोटानंतर समंथा ‘मायोसिटिस’ या ऑटो इम्यून आजाराचा सामना करत होती. या कठीण काळात तिला राजची साथ मिळाली. अखेर दोघांनी या नात्याचं विवाहबंधनात रुपांतर केलं.
