Samantha: आजारपणानंतर आता कशी आहे समंथाची प्रकृती? मैत्रिणीने दिली महत्त्वपूर्ण माहिती
समंथाच्या प्रकृतीविषयी जवळच्या मैत्रिणीने दिली मोठी अपडेट; अभिनेत्रीला मायोसिटीसचं झालं होतं निदान
मुंबई: दाक्षिणात्य चित्रपटसृष्टीतील लोकप्रिय अभिनेत्री समंथा रूथ प्रभू नेहमी कोणत्या ना कोणत्या कारणामुळे सोशल मीडियावर चर्चेत असते. समंथासाठी 2022 हे वर्ष फार काही खास नव्हतं. गेल्या वर्षी समंथाला मायोसिटीस या आजाराचं निदान झालं. या आजारावर ती परदेशात उपचार घेत होती. आता तिच्या जवळच्या एका मैत्रिणीने समंथाच्या प्रकृतिविषयी महत्वपूर्ण माहिती दिली आहे.
नुकत्याच दिलेल्या एका मुलाखतीत समंथाच्या मैत्रिणीने सांगितलं की आता ती पूर्णपणे ठीक आहे. त्याचप्रमाणे ती कामावर परतण्यास सज्ज झाली आहे. समंथा पूर्णपणे ठीक होईपर्यंत कोणत्याच चित्रपटात काम करणार नसल्याचं म्हटलं जात होतं.
समंथाच्या मैत्रिणीने पुढे सांगितलं, “जर तुम्हाला तिच्याशी संपर्क साधायचा असेल तर साधू शकता. पण मी तुम्हाला सांगू इच्छिते की ती कुठे परदेशी गेलेली नाही. माध्यमांमध्ये असं दाखवण्यात आलं की तिने घटस्फोटाबाबत एक मोठी लढाई लढली आहे. मात्र असं काही नाही. समंथाने फक्त एका आजारपणाशी दोन हात केले आहे आणि आता ती पूर्णपणे ठीक आहे.”
कामावर परतल्यावर समंथा आधी अभिनेता विजय देवरकोंडा सोबतच्या चित्रपटाची शूटिंग पूर्ण करणार आहे. यानंतर ती पुढील प्रोजेक्टवर काम करणार आहे.
मायोसिटीस म्हणजे काय?
मायोसिटिस ही आरोग्याची अशी एक स्थिती आहे ज्यामध्ये स्नायूंमध्ये तीव्र वेदना होतात. मायो म्हणजे स्नायू आणि आयटीस म्हणजे जळजळ (वेदना). याला व्हायरल इन्फेक्शन, विशिष्ट औषधं आणि स्वयं रोगप्रतिकार शक्ती अशी विविध कारणं कारणीभूत असू शकतात.
