बिग बी, अभिषेक, ऐश्वर्या, शाहरुखचा एकत्र डान्स; अंबानींच्या शाळेतील कार्यक्रमाचा व्हिडीओ समोर

मुंबई : 16 डिसेंबर 2023 | शुक्रवारी 15 डिसेंबर रोजी संध्याकाळी धिरुभाई अंबानी स्कूलमध्ये वार्षिक कार्यक्रमाचं आयोजन करण्यात आलं होतं. या शाळेत अनेक बॉलिवूड सेलिब्रिटींची मुलं शिक्षण घेतात. त्यामुळे या वार्षिक कार्यक्रमाला अमिताभ बच्चन, शाहरुख खान यांच्यापासून ते करीना कपूर, शाहिद कपूर यांच्यापर्यंत अनेक सेलिब्रिटी उपस्थित होते. आता याच कार्यक्रमातील एक व्हिडीओ सध्या सोशल मीडियावर व्हायरल होत आहे. ज्यामध्ये ऐश्वर्या राय बच्चन, अभिषेक बच्चन, अमिताभ बच्चन, करण जोहर, शाहरुख खान आणि त्याची मुलगी सुहाना खान हे एकत्र डान्स करताना दिसत आहेत. शाहरुखच्याच ‘ओम शांती ओम’ या चित्रपटातील ‘दिवानगी दिवानगी’ या गाण्यावर सर्वजण एकत्र नाचताना दिसत आहेत.

शाहरुखचा मुलगा अबराम, ऐश्वर्या-अभिषेकची मुलगी आराध्या यांनी या वार्षिक कार्यक्रमात नाटक सादर केलं होतं. या दोघांचं अभिनय पाहून नेटकरीसुद्धा भारावले. मुलांच्या सर्व परफॉर्मन्सनंतर त्यांच्या पालकांसाठी ‘ओम शांती ओम’ चित्रपटातील ‘दिवानगी दिवानगी’ हे गाणं वाजवण्यात आलं होतं. यावेळी सर्व पालकांसोबत बॉलिवूड सेलिब्रिटींनीही डान्स केला. ऐश्वर्या, अभिषेक, करण जोहर, शाहरुख खान हे सर्वजण एकत्र थिरकताना दिसले.

पहा व्हिडीओ

अंबानींच्या शाळेतील या वार्षिक कार्यक्रमात बॉलिवूड सेलिब्रिटींची मांदियाळी पहायला मिळाली. या कार्यक्रमातील मुलांच्या परफॉर्मन्सचेही व्हिडीओ सोशल मीडियावर समोर आले आहेत. आराध्या बच्चनने अत्यंत उत्तम अभिनय करत नेटकऱ्यांची मनं जिंकली. तर दुसरीकडे शाहरुखच्या 10 वर्षांच्या अबरामनेही स्टेजवर दमदार परफॉर्म केला. इतकंच नव्हे तर त्याने शाहरुखची आयकॉनिक पोझसुद्धा करून दाखवली. हे पाहून प्रेक्षकांमध्ये बसलेल्या शाहरुख, गौरी आणि सुहानाला हसू अनावर झालं होतं.

करीना कपूर आणि सैफ अली खान यांचा मुलगा तैमुरसुद्धा कार्यक्रमात सहभागी झाला होता. या कार्यक्रमात आपल्या मुलाचा अत्यंत कौतुकाने व्हिडीओ काढताना करीना दिसली. याशिवाय शाहिद कपूर आणि मीरा यांची मुलं, करण जोहरची दोन्ही मुलं या कार्यक्रमात सहभागी झाले होते. या सर्व स्टारकिड्सना वेगवेगळ्या वेशभूषेत पहायला मिळालं.