Sidhu Moose Wala: ‘अगला नंबर बापू का’; सिद्धू मूसेवालाच्या वडिलांना पाकिस्तानी नंबरवरून धमकीचा मेसेज
पंजाबी गायक आणि काँग्रेस नेता शुभदीप सिंह सिद्धू उर्फ सिद्धू मूसेवाला याची 29 मे रोजी पंजाबमधल्या मानसा याठिकाणी गोळ्या झाडून हत्या करण्यात आली. त्यानंतर आता त्याच्या वडिलांनाही जीवे मारण्याची धमकी मिळाली आहे.
दिवंगत पंजाबी गायक सिद्धू मूसेवालाचे (Sidhu Moose Wala) वडील बलकौर सिंग (Balkaur Singh) यांना पाकिस्तानस्थित फोन नंबरवरून (Pakistani number) सोशल मीडियावर धमकीचा मेसेज आल्याची माहिती त्यांच्या नातेवाईकांनी दिली. याप्रकरणी पोलीस तपास करत आहेत. ‘अगला नंबर बापू का’ असं त्या मेसेजमध्ये लिहिण्यात आलं आहे. हा मेसेज येताच सिद्धूच्या वडिलांना पोलिसांना त्याबद्दलची माहिती दिली. यानंतर पोलिसांनी तपास सुरू केला आहे. पंजाबी गायक आणि काँग्रेस नेता शुभदीप सिंह सिद्धू उर्फ सिद्धू मूसेवाला याची 29 मे रोजी पंजाबमधल्या मानसा याठिकाणी गोळ्या झाडून हत्या करण्यात आली. त्यानंतर आता त्याच्या वडिलांनाही जीवे मारण्याची धमकी मिळाली आहे.
धमकी मिळाल्यानंतर सिद्धूचे आईवडील हे काही दिवसांसाठी गावाबाहेर गेले आहेत. मंगळवारी सिद्धू मूसेवालाच्या अधिकृत इंस्टाग्राम पेजच्या स्टोरीमध्ये एक फोटो पोस्ट करण्यात आला. या फोटोच्या माध्यमातून मूसेवालाच्या आई-वडिलांना त्यांच्या घरी भेटून शोक व्यक्त करणाऱ्यांसाठी एक विनंती करण्यात आली. ‘सिद्धू मूसेवालाचे आईवडील काही महिन्यांसाठी गावाबाहेर गेले आहेत. जो कोणी त्यांना भेटायला येत असेल त्यांनी निराश होऊ नका. आम्ही तुम्हाला पोस्टद्वारे अपडेट करत जाऊ,’ असं त्यात म्हटलं आहे.
अमृतसरच्या होशियारनगर गावात पंजाब पोलिसांसोबतच्या चकमकीत दोन गँगस्टर्सना ठार मारण्यात आलं. त्यानंतर सिद्धूचे वडील बलकौर सिंह हे आरोपींची ओळख पटविण्यासाठी अमृतसरच्या सिव्हिल हॉस्पिटलमध्ये पोहोचले होते. मृतदेहांची ओळख पटल्यानंतर बलकौर सिंह म्हणाले, “पंजाब पोलीस खूप चांगलं काम करतेय. अशा पद्धतीची कारवाई झाली पाहिजे. ही तर केवळ सुरुवात आहे. हा लढा खूप मोठा आहे. या गँगस्टर्सना जरी ठार मारलं तरी माझा मुलगा मला परत मिळणार नाही.” सिद्धू मूसेवालाच्या हत्याप्रकरणात सामील असलेल्या दोन गँगस्टर्सना पंजाब पोलिसांनी मारल्याचं वृत्त आहे. अमृतसरमधील एका गावात पंजाब पोलीस आणि या गँगस्टर्समध्ये तब्बल पाच तास चकमक सुरू होती. या चकमकीत तीन पोलीस आणि एक पत्रकार जखमी झाला. तर जगरुप सिंह रुपा आणि मनप्रीत सिंह उर्फ मन्नू कुसा यांना ठार मारण्यात आलं.
