Rajpal Yadav : सर्वोच्च न्यायालयाचा राजपाल यादवला दणका, दिलं 24 तासांचं अल्टिमेटम; काय घडलं?
Rajapal Yadav Case : राजपाल यादव यांचे चेक बाऊन्स प्रकरण प्रलंबित आहे. न्यायालयाने अभिनेत्याला कोणत्याही परिस्थितीत ५ कोटी रुपये जमा करण्यास सांगितले होते, परंतु त्याने केवळ ५० लाख रुपये भरले. आता, सर्वोच्च न्यायालयाने त्याला पुन्हा फटकारले आहे.
राजपाल यादव ९ कोटी रुपयांच्या कर्जावरून कायदेशीर अडचणीत सापडला असून, सर्वोच्च न्यायालयानं त्याला तीन महिन्यांच्या तुरुंगवासाची शिक्षा सुनावली आहे. हा वाद २०१० सालचा असून अभिनेत्यानं ‘अता पता लपता’ या चित्रपटासाठी दिल्लीतील एका कंपनीकडून अंदाजे ५ कोटी रुपयांचं कर्ज घेतलं होतं. या प्रकरणाची सुनावणी ५ ऑक्टोबर रोजी होणार होती, आणि अभिनेत्यानं केवळ ५० लाख रुपये परत केले आहेत.
राजपाल यादवचा विनोदी चित्रपट बॉक्स ऑफिसवर फारसा यशस्वी ठरला नाही, त्यामुळे त्याला कर्ज फेडण्याइतकी कमाई करता आली नाही. कालांतरानं, व्याज आणि अतिरिक्त रकमेमुळे थकबाकीची रक्कम अंदाजे ९ कोटी रुपयांपर्यंत वाढली. १५ सप्टेंबर रोजी झालेल्या सुनावणीत, न्यायालयानं अभिनेत्याला तुरुंगवासातून सूट देऊन अंतरिम दिलासा दिला आणि ५ कोटी रुपये जमा करण्याचा आदेश दिला.
राजपाल यादव चेक बाऊन्स प्रकरणात एक नवीन वळण
मात्र, ५ ऑक्टोबरच्या सुनावणीपर्यंत, अभिनेत्यानं न्यायालयाच्या आदेशांचं पालन केलेलं नाही. लॉ बीटने ट्विट केलं की, ‘अभिनेता राजपाल यादववरील चेक बाऊन्स प्रकरणामध्ये ५ कोटी रुपये जमा करण्याच्या निर्देशाचं पालन न केल्याबद्दल सर्वोच्च न्यायालयानं त्याच्या विरोधात कठोर भूमिका घेतली आहे.’
राजपाल यादव आणि न्यायालय यांच्यातील संवाद
राजपाल यादवचे वकील म्हणाले, ५० लाख रुपयांच्या डिमांड ड्राफ्टची एक प्रत न्यायालयासमोर ठेवण्यात आली आहे. ती उद्यापर्यंत दिल्लीत पोहोचेल. सरन्यायाधीश सूर्यकांत यांनी विचारलं, ५० लाख रुपये? हे खरं आहे का? तक्रारदार: तो एक चित्रपट अभिनेता आहे, तो इथेही अभिनय करतो, त्याला न्यायालयाबद्दल आदर नाही…’
राजपाल यादव यांच्या वकिलांनी स्पष्ट केलं की, ‘बँका ३-४ दिवस बंद होत्या…’ त्यावर सर्वोच्च न्यायालयानं उत्तर दिलं की, ‘तुम्हाला दोन आठवड्यांची मुदत देण्यात आली होती… तुमची वेळ संपली आहे… तुम्ही मुदतवाढीसाठी अंतरिम अर्ज (IA) दाखल करू शकला असता.’ उद्यापर्यंत पैसे भरलेच पाहिजेत, असं सरन्यायाधीश म्हणाले.
सप्टेंबरमधील सुनावणीदरम्यान, राजपाल यादवचे प्रतिनिधित्व करणारे ज्येष्ठ वकील पी. एस. पटवालिया यांनी 5 कोटींची रक्कम जमा करण्यासाठी दोन आठवड्यांचा वेळ मागितला होता. त्यांनी सांगितलं की अभिनेत्याकडे पैसे नाहीत, पण त्यांना ते जमा करायचे आहेत. सर्वोच्च न्यायालयानं राजपालला 24 तासांची मुदत दिली आहे.
सरन्यायाधीशांनी असंही सांगितलं की, राजपाल यादवच्या पूर्वीच्या वर्तनामुळे विश्वास निर्माण होत नाही. या प्रकरणाची पुढील सुनावणी ७ ऑक्टोबर रोजी होणार आहे.
