Tamannaah Bhatia | “माझे आईवडीलसुद्धा असं विचारत नाहीत”; चाहत्याच्या प्रश्नावर भडकली तमन्ना

Tamannaah Bhatia

Image Credit source: Twitter

चेन्नई | 6 सप्टेंबर 2023 : दाक्षिणात्य चित्रपटसृष्टीसोबतच बॉलिवूडमध्येही आपली वेगळी ओळख निर्माण करणारी अभिनेत्री तमन्ना भाटिया सध्या तिच्या खासगी आयुष्यामुळे चर्चेत आहे. नुकतीच ती रजनीकांत यांच्या ‘जेलर’ चित्रपटात झळकली. याशिवाय अभिनेता विजय वर्मासोबतच्या रिलेशनशिपमुळेही ती चर्चेत आहे. या दोघांनी नेटफ्लिक्सवरील ‘लस्ट स्टोरीज 2’ या चित्रपटात एकत्र काम केलं होतं. नुकतीच तमन्नाने चेन्नईमधल्या एका कार्यक्रमात हजेरी लावली होती. यावेळी चाहत्यांशी संवाद साधताना एकाने तिला असा प्रश्न विचारला, ज्यामुळे ती नाराज झाली.

लग्नाबद्दल प्रश्न विचारताच तमन्ना नाराज

एका चाहत्याने तमन्नाला विचारलं, “तू लग्न कधी करणार आहेस? तमिळ मुलांना काही संधी आहे का?” हा प्रश्न ऐकून तमन्ना चांगलीच नाराज झाली. त्या चाहत्याला ती म्हणाली, “माझे आईवडीलसुद्धा मला अशा पद्धतीचा प्रश्न विचारत नाहीत.” नंतर तिला आणखी एका चाहत्याने विचारलं की, तिला कोणी चांगला मुलगा भेटला का? त्यावर तमन्ना म्हणाली, “मी सध्या माझ्या आयुष्यात खूप खुश आहे. होय, मी खूप खुश आहे.”

तमन्ना – विजयची लव्ह-स्टोरी

गेल्या वर्षी डिसेंबर महिन्यात जेव्हा तमन्ना आणि विजय यांचा किसिंग फोटो सोशल मीडियावर व्हायरल झाला, तेव्हापासून त्यांच्या अफेअरची चर्चा सुरू झाली. काही महिन्यांपूर्वीच दोघांनी माध्यमांसमोर जाहीरपणे एकमेकांबद्दलचं प्रेम कबुल केलं. विजय आणि तमन्ना आता खुलेपणाने डेट करताना दिसतात. नुकतेच हे दोघं मालदिवमध्ये सुट्ट्यांचा आनंद घेण्यासाठी गेले होते.

विजय आणि तमन्नाने ‘लस्ट स्टोरीज 2’ या नेटफ्लिक्सवरील अँथोलॉजी चित्रपटात एकत्र काम केलं. याच्या शूटिंगदरम्यान दोघांमध्ये जवळीक वाढली. सुरुवातीला दोघांनीही त्याबद्दल मौन बाळगणं पसंत केलं. मात्र नंतर दोघांनीही विविध मुलाखतींमध्ये एकमेकांबद्दलचं प्रेम जाहीरपणे व्यक्त केलं. जीक्यू इंडियाला दिलेल्या मुलाखतीत विजय वर्मा म्हणाला होता, “आम्ही दोघं एकमेकांना डेट करतोय. दोघं एकमेकांसोबत खूप खुश आहोत. मी तिच्या प्रेमात अक्षरश: वेडा आहे. माझ्या आयुष्यातील ‘विलेन’चा टप्पा आता संपलेला आहे, आता मी रोमान्सच्या टप्प्यात आहे.”