Tejas teaser | भारत को छेड़ोगे, तो छोड़ेंगे नहीं… कंगनाच्या ‘तेजस’चा जबरदस्त टीझर पाहिलात का?
अभिनेत्री कंगना रनौतच्या आगामी 'तेजस' या चित्रपटाचा टीझर प्रेक्षकांच्या भेटीला आला आहे. यामध्ये कंगना फायटर पायलच्या भूमिकेत असून चित्रपटाच्या टीझरला प्रेक्षकांकडून दमदार प्रतिसाद मिळतोय. येत्या 27 ऑक्टोबर रोजी हा चित्रपट प्रदर्शित होणार आहे.
मुंबई | 2 ऑक्टोबर 2023 : बॉलिवूडची क्वीन अर्थात अभिनेत्री कंगना रनौतचा ‘चंद्रमुखी 2’ हा चित्रपट नुकताच प्रदर्शित झाला. या चित्रपटाला प्रेक्षकांकडून संमिश्र प्रतिसाद मिळत आहे. अशातच कंगनाच्या आणखी एका चित्रपटाचा टीझर प्रेक्षकांच्या भेटीला आला आहे. ‘तेजस’ असं तिच्या या आगामी चित्रपटाचं नाव असून यामध्ये कंगनाचा दमदार अंदाज पहायला मिळतोय. यामध्ये कंगनाने फायटर पायलटची भूमिका साकारली आहे. येत्या 27 ऑक्टोबर रोजी हा बहुप्रतिक्षित चित्रपट थिएटरमध्ये प्रदर्शित होणार असून यामध्ये कंगना तेजस गिलच्या भूमिकेत आहे.
कंगनाने तिच्या सोशल मीडिया अकाऊंटवर ‘तेजस’चा टीझर पोस्ट केला आहे. या टीझरच्या सुरुवातीलाच एअरफोर्स प्लेन दाखवला जातो. त्यानंतर कंगना तिच्या युनिफॉर्ममध्ये समोर येते. “जरुरी नहीं की हर बार बातचित होनी चाहिए. जंग के मैदान में अब जंग होनी चाहिए. की हो गया मेरे वतन पर अब बहुत ही सितम, अब तो आकाश से बारिश नहीं आग बरसनी चाहिए”, असा दमदार डायलॉग टीझरमध्ये ऐकायला मिळतो. कंगनाच्या तोंडी असलेला ‘भारत को छेडोगे तो छोडेंगे नहीं’ या डायलॉगनेही प्रेक्षकांचं लक्ष वेधलंय. हा टीझर शेअर करत कंगनाने कॅप्शनमध्ये लिहिलं, ‘आपल्या देशाच्या प्रेमासाठी उड्डाण करायला सज्ज आहे. येत्या 8 ऑक्टोबर रोजी इंडियन एअरफोर्स दिवसानिमित्त याचा ट्रेलर प्रदर्शित होईल.’
पहा टीझर
कंगनाच्या या चित्रपटाच्या टीझरचं नेटकऱ्यांकडून कौतुक होत आहे. ‘अंगावर काटा आला’, असं एकाने लिहिलं. तर ‘हा ब्लॉकबस्टर चित्रपट असेल’, असं दुसऱ्याने म्हटलंय. ‘लोक तिचा तिरस्कार करू शकतात, पण कंगनाच्या प्रतिभेकडे दुर्लक्ष करता येणार नाही’, अशा शब्दांत नेटकऱ्यांनी तिचं कौतुक केलंय. कंगनाच्या ‘तेजस’ या चित्रपटाचं दिग्दर्शन सर्वेश मेवाडाने केलंय. यामध्ये कंगनासोबतच वरुण मित्राची मुख्य भूमिका आहे. एअरफोर्स पायलट तेजस गिलच्या आयुष्यावर आधारित हा चित्रपट आहे.
