‘भांडी घासण्याच्या ट्रॉमा’वरून ट्रोल करणाऱ्यांना ‘कोकण हार्टेड गर्ल’च्या बहिणींनी सुनावलं

'कोकण हार्टेड गर्ल' ट्रोल

Image Credit source: Instagram

बिग बॉस मराठीचा पाचवा सिझन सुरु झाला आहे. पहिल्याच आठवड्यात बिग बॉसच्या घरात बराच ड्रामा पाहायला मिळत आहे. सोशल मीडिया इन्फ्लुएंसर ‘कोकण हार्टेड गर्ल’ अर्थात अंकिता प्रभू वालावलकरदेखील बिग बॉसच्या घरात आहे. अंकिता वालावलकर हिचा एक व्हीडिओ सध्या प्रचंड व्हायरल होत आहे. यात ती ‘भांडी घासण्याच्या ट्रॉमा’वर बोलताना दिसतेय. आर्या जाधवशी बोलताना ‘भांडी घासण्याच्या ट्रॉमा’ असल्याचं सांगते. तिचा हा व्हीडिओ सध्या प्रचंड व्हायरल होत आहे. अंकिता वालावलकरला प्रचंड ट्रोल केलं जात आहे. सोशल मीडियावर तिच्यावर मिम्स बनत आहेत.

‘कोकण हार्टेड गर्ल’ ट्रोल

मला भांडी घासायचा ट्रॉमा आहे. तरिही मी ते करत आहे. माझ्या घरच्यांना पण माहिती आहे, असं अंकिता म्हणते. त्यावर मी भांडी घासते, असं आर्या तिला म्हणते. पण त्यावर नाही मला भांडी घासायचीच आहेत. कारण मला माझ्यातील विक पॉइंटवर काम करायचं आहे, असं अंकिता तिला सांगते. जिथं भांडणं दिसतात. तिथून बाजूला व्हायचं. विनाकारण भांडायचं नाही. वाद होतील, असं दिसलं तर तिथून बाजूला व्हायचं, असं अंकिता आर्याला सांगते. तिचा हा व्हीडिओ प्रचंड व्हायरल होत आहे. नेटकऱ्यांनी कमेंट करत अंकिताला ट्रोल केलं आहे. तिच्या या व्हीडिओवर अनेकांनी मिम्स देखील बनवले आहेत.

बहिणींकडून व्हीडिओ शेअर करत उत्तर

अंकिता वालावलकर हिला ट्रोल केल्यानंतर तिच्या बहिणींनी एक व्हीडिओ शेअर केलाय. त्यांनी ट्रोलर्सना उत्तर दिलं आहे. ट्रॉमा म्हणजे मनाला झालेली जखम… मी पण जर एक सामान्य व्यक्ती असते तर मी देखील अशीच कमेंट केली असती. पण कधी-कधी आपल्याला सामान्य वाटणारी गोष्ट समोरच्यासाठी किती कठीण असू शकते, याची आपण कल्पनाही करू शकत नाही. पण या गोष्टीवरून एखाद्या व्यक्तीला ट्रोल करणं योग्य नाही, असं अंकिताच्या लहान बहिणीने म्हटलं आहे.

आपल्यातली माणुसकी किती लयाला गेली आहे का? की एखाद्याचा ट्रॉमा आपल्यासाठी हसण्याचं साधन बनावं… मिम मटेरियल बनावं?, असंही अंकिताच्या बहिणीने म्हटलं आहे. सोशल मिडियावरच्या 2 मिनिटांच्या क्लिपवरून आपण एखाद्या व्यक्तीचं अख्खं आयुष्य क्षणात जज करतो. पण कधी- कधी आपल्याला क्षुल्लक वाटणारी गोष्ट एखाद्याला आयुष्यभराची जखम देणारी असू शकते हे आपण सपशेल विसरतो. बाकी प्रेक्षकाक काळजी…, अशी पोस्ट अंकिताच्या अकाऊंटवर शेअर करण्यात आली आहे.