उर्मिला कोठारेचं 12 वर्षांनंतर छोट्या पडद्यावर कमबॅक, ‘तुझेच मी गीत गात आहे’ मालिका लवकरच स्टार प्रवाहवर प्रेक्षकांच्या भेटीला
अभिनेत्री ऊर्मिला कोठारे तब्बल12 वर्षांनंतर तुझेच मी गीत गात आहे या मालिकेतून छोट्या पडद्यावर दमदार कमबॅक करणार आहे. वैदेही असं तिच्या पात्राचं नाव असून ती स्वराच्या आईची भूमिका साकारणार आहे.
मुंबई : स्टार प्रवाहवरील (star pravah) जवळपास सर्वच मालिका लोकप्रियतेच्या शिखरावर आहेत. दर्जेदार संहिता, दमदार कलाकारांची फौज आणि तितकंच उत्तम दिग्दर्शन यामुळेच स्टार प्रवाहवरील मालिकांमधील प्रत्येक पात्र प्रेक्षकांच्या कुटुंबाचा महत्वाचा भाग बनली आहेत. स्टार प्रवाहच्या या परिवारात लवकरच आणखी एका नव्या मालिकेचं कुटुंब सामील होणार आहे. या नव्या मालिकेचं नाव आहे तुझेच मी गीत गात आहे (Tujhech me geet gat ahe). गाण्याचं स्वप्न उराशी बाळगलेल्या आणि अत्यंत प्रतिकूल परिस्थितीत ते पूर्ण करण्यासाठी झटणाऱ्या चिमुकल्या स्वराची गोष्ट या मालिकेतून प्रेक्षकांच्या भेटीला येईल.अभिनेत्री उर्मिला कोठारे (urmila Kothare) तब्बल12 वर्षांनंतर या मालिकेतून छोट्या पडद्यावर दमदार कमबॅक करणार आहे. वैदेही असं तिच्या पात्राचं नाव असून ती स्वराच्या आईची भूमिका साकारणार आहे.
तुझेच मी गीत गात आहे या मालिकेतल्या भूमिकेविषयी सांगताना उर्मिला म्हणाली, “खूप वर्षांनंतर हा छान योग जुळून आला आहे. स्टार प्रवाहसोबत आणि अर्थातच स्टार प्रवाहचे कार्यक्रम प्रमुख सतीश राजवाडे यांच्यासोबत खूप जुनं नातं आहे. वैदेही हे पात्र साकारताना खूप धमाल येतेय. सेटवर खूप खेळीमेळीचं वातावरण असतं. याआधी प्रेक्षकांनी मला ग्लॅमरस रुपात पाहिलं आहे. मात्र या मालिकेतला माझा लूक आणि व्यक्तिरेखा खूपच वेगळी आणि आव्हानात्मक आहे. स्टार प्रवाहच्या सर्वच मालिका मी आवर्जून पहाते. नायिका म्हणून या प्रवाहात आता मी देखिल सामील होणार आहे त्यामुळे मी खूपच उत्सुक आहे.”
तुझेच मी गीत गात आहे या मालिकेतून उर्मिला पुन्हा एकदा छोद्या पडद्यावर पाहायला मिळणारा आहे. ही नवी मालिका 2 मे पासून रात्री 9 वाजता स्टार प्रवाहवर पाहायला मिळणार आहे.
संबंधित बातम्या