Urfi Javed | उर्फी जावेदची आतापर्यंतची सर्वांत विचित्र फॅशन; नवा कारनामा पाहून भडकले नेटकरी
'उर्फीला कपडे आणि मानसोपचाराचीही फार गरज आहे', असंही काहींनी म्हटलं आहे. उर्फीचं हे फॅशन आतापर्यंतचं सर्वांत विचित्र फॅशन असेल, असा अंदाज नेटकऱ्यांनी वर्तवला आहे.
मुंबई : चित्रविचित्र फॅशन आणि अभिनेत्री उर्फी जावेद हे समीकरण नेटकऱ्यांना दररोज सोशल मीडियावर पहायला मिळतं. हल्ली पापाराझींच्याही सोशल मीडिया अकाऊंटवर प्रसिद्धीसाठी उर्फीचे व्हिडीओ पोस्ट केले जातात. चित्रविचित्र फॅशनसोबतच उर्फी अंगप्रदर्शनामुळे अनेकदा ट्रोल होते. आता नुकताच तिने तिच्या अकाऊंटवर एक व्हिडीओ पोस्ट केला आहे. या व्हिडीओमध्ये ती नवीन प्रयोग करताना दिसतेय. मात्र तिच्या प्रयोगाचा व्हिडीओ नेटकऱ्यांना अजिबात आवडला नाही. व्हिडीओ पाहताच अनेकांनी तिच्यावर टीका करण्यात सुरुवात केली. यावेळी उर्फीने कोणत्याही वस्तूपासून तिचा ड्रेस बनवला नाही. तर तिने अंगावरच काहीतरी लावून घेण्यास सुरुवात केली आहे. हा व्हिडीओ पाहिल्यानंतर उर्फी नक्की काय करतेय, असा प्रश्न अनेकांना पडला आहे.
उर्फीने पोस्ट केलेल्या या व्हिडीओमध्ये तिच्यासोबत काही महिलासुद्धा दिसत आहेत. या महिला उर्फीच्या अंगावर पांढऱ्या रंगाचा पेस्ट लावत आहेत. यासोबतच तिने एक फोटो पोस्ट केला आहे, ज्यामध्येही तिच्या शरीरावर पोस्ट लावल्याचं दिसून येत आहे. ‘काहीतरी हटके येणार आहे, प्रतीक्षा करा..’ असं कॅप्शन तिने या व्हिडीओला दिलं आहे. आता उर्फी कोणती अजब गोष्ट करू शकते, हे फक्त तीच सांगू शकते. मात्र या व्हिडीओवरून अनेकांनी तिला ट्रोल केलं आहे.
‘या मुलीने देशाच्या संस्कृतीची ऐशीची तैशी केली आहे’, असं एकाने लिहिलं. तर अनेकांनी व्हिडीओवर डिस्लाइक (नावडल्याचं) बटण असलं तर बरं झालं असतं, असं म्हटलंय. ‘ही तर हद्दच झाली’, असंही दुसऱ्या युजरने म्हटलं आहे. ‘उर्फीला कपडे आणि मानसोपचाराचीही फार गरज आहे’, असंही काहींनी म्हटलं आहे. उर्फीचं हे फॅशन आतापर्यंतचं सर्वांत विचित्र फॅशन असेल, असा अंदाज नेटकऱ्यांनी वर्तवला आहे.
पहा व्हिडीओ
उर्फीने तिच्या चित्रविचित्र फॅशनमुळे फक्त नेटकऱ्यांचंच नाही तर सेलिब्रिटींचंही लक्ष वेधलं आहे. अभिनेत्री करीना कपूरने उर्फीचं कौतुक केलं होतं. उर्फीच्या बोल्ड फॅशनबद्दल तुला काय वाटतं असा प्रश्न करीनाला एका मुलाखतीत विचारण्यात आला होता. त्यावर ती म्हणाली, “फॅशन म्हणजे व्यक्त होणं आणि व्यक्त होण्याचं स्वातंत्र्य. माझ्या मते उर्फीमध्ये हाच आत्मविश्वास आहे आणि त्यात आत्मविश्वासाने ती कपडे घालते. मला ती खूपच कूल वाटते.”
