Vivek Oberoi: हे तर लोकशाहीचं चांगलं लक्षण… सोनम वांगचुक यांच्या उपोषणावर विवेक ओबेरॉयचं विधान चर्चेत
देशभरात सध्या एकच मुद्याची चर्चा होत आहे आणि तो म्हणजे सोनम वांगचुक. सोनम वांगचुक उपोषणाला बसून आता 20 दिवस झाले आहेत. त्यांच्या उपोषणावर अनेक सेलिब्रिटींनी आपले मत मांडले आहे. आता यावर विवेक ऑबेरोयला प्रश्न विचारताच तो काय म्हणाला ते पाहा...
सोनम वांगचुकचा उपोषण देशभरात चर्चेचा विषय बनला आहे. अनेक चित्रपट कलाकारांनी त्याला उघडपणे पाठिंबा दर्शवला आहे. तर काहींनी यावर भाष्य करायचे नाही असंही ठरवले आहे. दरम्यान, जेव्हा अभिनेता विवेक ओबेरॉयला या विषयावर विचारण्यात आले, तेव्हा त्याने दिलेल्या उत्तरामुळे सोशल मीडियावर एका नवीन चर्चेला सुरुवात झाली. विवेकने स्पष्टपणे सांगितले की तो एक अभिनेता आहे, राजकारणी नाही. त्याचे हे विधान इंटरनेटवर वेगाने व्हायरल झाले. काहींना त्याचे विधान योग्य वाटले, तर काहींनी त्याच्यावर टीका केली. त्याची मुलाखत सतत चर्चेत राहिली आहे. एका मीडिया संवादादरम्यान, विवेक ओबेरॉयला सोनम वांगचुकच्या आंदोलनाबद्दल आणि उपोषणाबद्दल विचारण्यात आले. त्याने उत्तर दिले, “मी एक अभिनेता आहे, राजकारणी नाही. मी राजकारणाकडे फारसे लक्ष देत नाही. मी फक्त गोष्टींचे निरीक्षण करतो आणि त्यातून शिकण्याचा प्रयत्न करतो.” त्याने उघडपणे कोणतीही भूमिका न मांडणं हे निवडलं.
विवेकने या आंदोलनाला पाठिंबा किंवा विरोध केला नसला तरी, त्याने लोकशाहीबद्दल आपले विचार व्यक्त केले. तो म्हणाला की, “एका चांगल्या लोकशाहीत प्रत्येक व्यक्तीला आपले विचार व्यक्त करण्याचा अधिकार असावा. जर लोक आवाज उठवत असतील, तर ही लोकशाहीची चांगली गोष्ट आहे. या संपूर्ण प्रकरणातून आपण हेच शिकलो,” असे तो म्हणाला.
विवेक ओबेरॉयने या प्रकरणापासून स्वतःला दूर ठेवले असले तरी, प्रकाश राज, विशाल दादलानी, नसीरुद्दीन शाह, अतुल कुलकर्णी, सयाजी शिंदे, सोनाक्षी सिन्हा, कुनिका सदानंद आणि देवोलीना भट्टाचार्जी, शबाना आझमी, इमरान खान, फातिमा सना खान, आदिती राव हैदरी, अनुराग कश्यप, अभय देओल, झिनत अमान, रत्ना पाठक शाह, ओम वैद्य, स्वरा भास्कर, सोनी राझदान, रुबीना दिलैक, समय रैना यांसारख्या अनेक सेलिब्रिटींनी सोनम वांगचुकच्या समर्थनार्थ आवाज उठवला आहे. अनेकांनी आपल्या सोशल मीडियावर वांगचुक यांच्या समर्थनात पोस्ट केल्या आहेत. यामुळे आता विवेकने केलेल्या विधानाची जोरदार चर्चा होत आहे.
