15 व्या वर्षी बालकलाकारने खरेदी केलं कोट्यवधींचं घर; सांगितलं सीक्रेट

मुंबई: स्टार प्लस वाहिनीवरील ‘ये है मोहब्बतें’ ही मालिका खूप गाजली होती. या मालिकेतील दिव्यांका त्रिपाठी आणि करण पटेल या मुख्य कलाकारांच्या जोडीसोबत चिमुकल्या रूहीने चाहत्यांची मनं जिंकली होती. ही रुही आता 15 वर्षांची झाली आहे आणि वयाच्या 15 व्या वर्षीच तिने हक्काचं घर खरेदी केलं आहे. सोशल मीडियावर फोटो पोस्ट करत बालकलाकार रुहानिका धवनने चाहत्यांना ही आनंदाची बातमी सांगितली. याचसोबत रुहानिकाने हे घर घेण्यामागचं सीक्रेटसुद्धा सांगितलं आहे.

रुहानिकाच्या या यशाबद्दल चाहते तिच्यावर कौतुकाचा आणि शुभेच्छांचा वर्षाव करत आहेत. इन्स्टाग्रामवर पोस्ट केलेल्या या फोटोंमध्ये रुहानिकाचं घर पहायला मिळतंय. या यशामागचं श्रेय तिने तिच्या आईला दिलं आहे.

‘वाहेगुरुजी आणि माझ्या आईवडिलांच्या आशीर्वादामुळे मी ही नवी सुरुवात करू शकले. माझ्या आयुष्यातील सर्वांत मोठं स्वप्न मी पूर्ण केलंय. माझं हक्काचं घर मी विकत घेतलंय. माझ्यासाठी ही खूप मोठी गोष्ट आहे. मला मिळालेल्या संधींमुळे मी हे स्वप्न पूर्ण करू शकले. अर्थात माझ्या आईवडिलांच्या मार्गदर्शनाशिवाय हे स्वप्न पूर्ण होऊ शकलं नसतं’, अशा शब्दांत तिने आनंद व्यक्त केला.

‘माझ्या आईचा मी विशेष उल्लेख करेन, कारण माझ्यासाठी ती जणू जादूगारच आहे. ती त्या प्रत्येक आईसारखी आहे, जी प्रत्येक पैसा जमा करून ती रक्कम दुप्पट करते. हे ती तसं करते ते फक्त देव आणि तिलाच ठाऊक असतं. माझ्या स्वप्नांची ही तर सुरुवात आहे. याहून मोठी माझी काही स्वप्नं आहेत. तुम्हीसुद्धा तुमच्या स्वप्नांसाठी प्रयत्न करत राहिलात तर एकेदिवशी यश नक्कीच मिळेल’, असं तिने लिहिलं.

रुहानिकाला ‘ये है मोहब्बतें’ या मालिकेतून लोकप्रियता मिळाली. सोशल मीडियावरही तिचा मोठा चाहतावर्ग आहे. इन्स्टाग्रामवर तिचे एक दशलक्षांहून अधिक फॉलोअर्स आहेत.