Video: युद्धामुळे डोनाल्ड ट्रम्प यांची झोप उडाली? व्हाईट हाऊसमधील त्या व्हिडीओने खळबळ; हादरवणारं सत्य समोर!

मध्यपूर्वेतील युद्धाने भीषण वळण घेतले आहे. आज (७ मार्च) पर्यंत इराण आणि इस्रायल यांच्यातील संघर्ष आठव्या दिवशीही सुरू आहे. दोन्ही देश एकमेकांवर क्षेपणास्त्रे आणि ड्रोन हल्ले करत आहेत. हा संघर्ष केवळ इराण आणि इस्रायलपुरता मर्यादित न राहता अमेरिकेलाही गंभीर चिंतेचा विषय बनला आहे. अमेरिका इस्रायलला पूर्ण पाठिंबा देत असून, इराणकडून प्रत्युत्तरादाखल आखाती देशांतील अमेरिकी लष्करी तळांवर हल्ले होत आहेत. या युद्धामुळे सर्व पक्षांना मोठे नुकसान सहन करावे लागत आहे आणि शांतीची गरज सर्वांना जाणवत आहे. या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी व्हाईट हाऊसमधील ओव्हल ऑफिसमध्ये एका विशेष प्रार्थना सभेचे आयोजन केले. हा क्षण सोशल मीडियावर वेगाने व्हायरल झाला आहे. पण हा व्हिडीओ खरा आहे का? असा प्रश्न अनेकांना पडला आहे.

ट्रम्प खुर्चीवर बसून डोळे मिटले

व्हायरल झालेल्या व्हिडीओमध्ये ट्रम्प ओव्हल ऑफिसमधील त्यांच्या खुर्चीवर बसलेले दिसत आहेत. त्यांच्या आजूबाजूला देशभरातील ख्रिश्चन पाद्री आणि धार्मिक नेते उभे आहेत. हे पाद्री एकत्रित प्रार्थना करत असताना ट्रम्प डोळे मिटून प्रार्थनेत सहभागी झालेले दिसत आहेत. काही पाद्रींनी ट्रम्प यांच्या खांद्यावर, हातावर किंवा डोक्यावर हात ठेवले आहेत. ही प्रार्थना राष्ट्राच्या रक्षणासाठी, अमेरिकी सैनिकांच्या सुरक्षेसाठी आणि ट्रम्प यांना मार्गदर्शन व शक्ती मिळावी यासाठी करण्यात आली.

Happening Now in the Oval Office at the @WhiteHouse.

God Bless the USA!

🙏❤️🇺🇸🦅 pic.twitter.com/Ebi7DnAnhK

— Dan Scavino (@Scavino47) March 5, 2026

व्हाईट हाऊसचे डेप्युटी चीफ ऑफ स्टाफ डॅन स्कॅव्हिनो यांनी हा व्हिडीओ शेअर करत “God Bless the USA” (अमेरिकेला देव आशीर्वाद देवो) असे कॅप्शन लिहिले आहे. अमेरिकन मीडियानुसार, ट्रम्प यांनी देशभरातील अनेक पाद्रींना ओव्हल ऑफिसमध्ये प्रार्थनेसाठी आमंत्रित केले होते. ही प्रार्थना सभा ५ मार्च २०२६ रोजी झाली असून, यात अमेरिकेच्या सैन्याच्या यशासाठी आणि राष्ट्राच्या एकतेच्या दृष्टीने प्रार्थना करण्यात आली.

ट्रम्प यांनी या प्रसंगी पाद्रींशी वैयक्तिक संवाद साधला आणि त्यांच्या प्रार्थनेचे आभार मानले. हा व्हिडीओ आणि फोटो सोशल मीडियावर लाखो वेळा पाहिले गेले असून, यावर विविध प्रतिक्रिया येत आहेत. काहींनी याला सकारात्मक पाऊल म्हटले तर काहींनी यावर टीका केली आहे. काहींनी तर हा व्हिडीओ AIच्या माध्यमातून तयार केला असल्याचा दावा केला आहे.