कोण आहेत गालिबफ? ज्यांच्या नावावर थांबू शकतं हे भीषण युद्ध, अमेरिकेने त्यांना सुप्रीम लीडर बनवण्यासाठी टाकला डाव
Iran-US War Update : अमेरिकेला मध्य पूर्वेतील युद्धातून आता बाहेर पडायचं आहे. त्यासाठी त्यांनी पडद्यामागून हालचाली सुरु केल्या आहेत. अमेरिकची युद्धनिती आता तहाकडे झुकण्याची वेळ आल्याचे संकेत देत आहे. अमेरिका ज्या गालिबफ यांच्याशी संपर्क साधण्याचा प्रयत्न करत आहे ते कोण आहेत?
अमेरिका आणि इराणमध्ये पडद्यामागे काय घडतय? या बद्दल सस्पेन्स कायम आहे. एकाबाजूला अमेरिकी राष्ट्रपती डोनाल्ड ट्रम्प यांनी चर्चा सुरु झाल्याचा दावा केलाय. दुसरीकडे इराणने म्हटलय की, आमची अमेरिकेसोबत कुठलीही चर्चा सुरु नाहीय. या दरम्यान सीजफायरवरुन अमेरिकेच्या एका प्लानचा खुलासा झाला आहे. अमेरिका इराणमधल्या एका कट्टरपंथीयाला आपल्या बाजूला वळवण्याचा प्रयत्न करत आहे. आपल्यासाठी त्याने काम करावं अशी अमेरिकेची इच्छा आहे. यासाठी ट्रम्प प्रशासन त्या अधिकाऱ्याची मनधरणी करत आहे. या अधिकाऱ्याचं नाव आहे, मोहम्मद बी गालिबफ.
ट्रम्प प्रशासन गालिबफला विश्वासात घेण्याचा प्रयत्न करत आहे असं अमेरिकी मीडिया आउटलेट एक्सियोसने व्हाइट हाऊसमधील सूत्रांच्या हवाल्याने म्हटलं आहे. गालिबफच्या मदतीनेच इराणमधील आपलं हित साधलं जाऊ शकतं, असं ट्रम्प प्रशानसाला वाटतय. गालिबफ सोबत चर्चेसाठी राष्ट्रपती ट्रम्प उपराष्ट्रपती जेडी वेन्स यांना पाठवायलाही तयार आहेत.
कोण आहेत गालिबफ?
गालिबफ इराणमधील कट्टरपंथीय विचारधारेचा नेता मानला जातो. सध्या ते इराणी संसदेत स्पीकर आहेत. त्यांना इराणचे दुसरे सुप्रीम लीडर अयातुल्ला अली खामेनेई यांचं विश्वासू मानलं जायचं. गालिबफ यांनी इस्लामिक रिवोल्यूशनरी गार्डमधील एक जवान म्हणून आपल्या करिअरची सुरुवात केलेली. या गार्ड्सचे जनरल म्हणूनही त्यांनी काम केलय. सैन्यातून बाहेर पडल्यानंतर गालिबफ यांना तेहरानचे महापौर म्हणून नियुक्त करण्यात आलं.
गालिबफ किती वेळा राष्ट्रपतीपदाच्या निवडणुकीत हरले?
गालिबफ यांनी दोनवेळा इराणच्या राष्ट्रपतीपदाची निवडणूक लढवली आहे. 2013 साली पहिल्यांदा गालिबफ राष्ट्रपतीपदाच्या निवडणुकीत उतरले होते. पण त्यावेळी रुहानी यांनी त्यांचा पराभव केला. 2024 च्या राष्ट्रपतीपदाच्या निवडणुकीतही गालिबफ मसूद पजेशकियन यांच्याकडून निवडणूक हरले.
अमेरिकी सुरक्षा एजन्सीजनुसार गालिबफ असे एकमेव नेते आहेत, जे मुज्तबा खामेनेईच्या निर्णयात दखल देऊ शकतात. खामेनेई ज्यांचं म्हणणं ऐकू शकतात. म्हणूनच अमेरिका गालिबफ यांच्याशी संपर्क साधण्याचा प्रयत्न करत आहे.
गालिबफने स्वत: काय म्हटलय?
पॉलिटिकोनुसार अमेरिकी प्रशासनाला गालिबफ सुप्रीम लीडर म्हणून मान्य आहेत. मुज्तबाच्या जागी गालिबफला सुप्रीम लीडर बनवावं अशी अमेरिकेची इच्छा आहे. सोमवारी 23 मार्च रोजी पत्रकारांच्या एका प्रश्नाला उत्तर देताना ट्रम्प यांनी सांगितलं की, ‘इराणच्या सुप्रीम लीडरसोबत मिळून होर्मुजवर कंट्रोल करणार’ ट्रम्प यांना जास्त प्रश्न विचारल्यावर ते बोलले की, ‘मी जास्त काही सांगू शकत नाही, कारण त्याला मारलं जाऊ शकतं’ अमेरिकी मीडियामध्ये ट्रम्प प्रशासनाची गालिबफ यांच्याशी चर्चा सुरु असल्याची बातमी वेगाने पसरली. त्यानंतर गालिबफने स्वत: सोशल मीडियावर येऊन अशी कुठलीही चर्चा सुरु नसल्याचा दावा केला.
