न्यूयॉर्कच्या टाइम्स स्क्वेअरवर झळकले मोहन भागवत यांचे फोटो, थोड्याच वेळात मॅडिसन स्क्वेअर गार्डनमध्ये संबोधन

अमेरिकेतली न्यूयॉर्कच्या मॅडिसन स्क्वेअर गार्डनमध्ये (MSG) राष्ट्रीय स्वयंसेवक संघाचे (RSS) प्रमुख मोहन भागवत शनिवारी संध्याकाळी भारतीय समुदायातील नागरिकांना संबोधित करणार आहेत. त्याआधी टाइम्स स्क्वेअरच्या मध्यभागी असलेल्या एका बिलबोर्डवर मोहन भागवत यांची छायाचित्रे झळकली. राष्ट्रीय स्वयंसेवक संघाच्या स्थापनेला 100 वर्षे पूर्ण होत असल्याच्या पार्श्वभूमीवर आयोजित ग्लोबल आउटरीच कार्यक्रमासाठी भागवत मंगळवारी अमेरिकेत पोहोचले. त्यांच्या या दौऱ्यात कॅनडा आणि ब्रिटनचाही समावेश आहे.

अमेरिकेतील प्रसिद्ध मॅडिसन स्क्वेअर गार्डनमध्ये शनिवारी भागवत सुमारे 5 हजार लोकांना संबोधित करणार आहेत. ‘युनिव्हर्सल वननेस सेलिब्रेशन’ असे या कार्यक्रमाचे नाव असून, अमेरिकन हिंदूज फॉर एंगेजमेंट अँड डायलॉग (AHEAD) या संस्थेकडून त्याचे आयोजन करण्यात आले आहे. आयोजकांनी या कार्यक्रमाचे वर्णन रक्षाबंधनाच्या विशेष सभेच्या रूपात केले आहे. पीटीआयच्या वृत्तानुसार, सांस्कृतिक सादरीकरण आणि मुख्य भाषणाच्या माध्यमातून या कार्यक्रमात जागतिक एकता तसेच ‘वसुधैव कुटुंबकम्’ या हिंदू तत्त्वज्ञानावर चर्चा केली जाणार आहे. ‘संपूर्ण जग हे एक कुटुंब आहे’, असा या तत्त्वज्ञानाचा अर्थ आहे.

टाइम्स स्क्वेअरच्या बिलबोर्डवर भागवत यांची छायाचित्रे

मॅडिसन स्क्वेअर गार्डनमधील कार्यक्रमापूर्वी शुक्रवारी संध्याकाळी टाइम्स स्क्वेअरमधील एका प्रमुख बिलबोर्डवर ‘रिझॉल्व्ह, हार्मनी अँड डायलॉग’ या शीर्षकासह मोहन भागवत यांची छायाचित्रे झळकली. बिलबोर्डवर भागवत यांची छायाचित्रे दिसताच भारतीय-अमेरिकन समुदायातील अनेक सदस्यांनी टाइम्स स्क्वेअरमध्ये त्यासमोर फोटो काढले.

दरम्यान, मॅडिसन स्क्वेअर गार्डनमध्ये मोहन भागवत यांच्या नियोजित कार्यक्रमावर काही नागरी हक्क संघटनांनी टीका केली आहे. न्यूयॉर्क शहराचे महापौर जोहरान ममदानी यांनीही या कार्यक्रमाला आपला पाठिंबा नसल्याचे म्हटले आहे. मात्र, हा ‘खासगी’ कार्यक्रम असल्याने तो रद्द करण्याचा अधिकार शहर प्रशासनाकडे नसू शकतो, असेही ममदानी यांनी स्पष्ट केले.

इस्कॉनच्या संस्थापकांना श्रद्धांजली

अमेरिकेतील दौऱ्यात मोहन भागवत यांनी भारतीय वंशाच्या नागरिकांशी, इंडियन-अमेरिकन व्यावसायिक आणि विविध समुदायांच्या नेत्यांशी बैठका व चर्चा केली. याशिवाय त्यांनी न्यूयॉर्कमधील भक्ती सेंटरला भेट दिली. यावेळी त्यांनी इंटरनॅशनल सोसायटी फॉर कृष्णा कॉन्शसनेस (ISKCON) चे संस्थापक आणि भारतीय आध्यात्मिक गुरू श्रील ए. सी. भक्तिवेदांत स्वामी प्रभुपाद यांना श्रद्धांजली अर्पण केली.