पाकिस्तानचा आतापर्यंतचा सर्वात भयानक हल्ला, तालिबानच्या सर्वोच्च नेत्यासोबत भयंकर घडलं; रात्रीच्या अंधारात थेट…
पाकिस्तान आणि अफगाणिस्तान यांच्यातील संघर्ष अजूनही संपलेला नाही. आता नुकतेच पाकिस्तानने अफगाणिस्तावर मोठे हवाई हल्ले केले आहेत. अफगाणिस्तान सरकारने हे हल्ले झाल्याचे मान्य केले आहे.
Pakistan Afghanistan War : जगाने एकीकडे अमेरिका-इस्रायल आणि इराण यांच्यातील युद्धाने धसका घेतला आहे. 28 फेब्रुवारी रोजी युद्ध सुरू झाल्यानंतर इराणने होर्मुझची सामुद्रधुनी बंद केली. त्यामुळे भारतासह अनेक देशांना कच्चे तेल, नैसर्गिक वायू यासारख्या इंधनाचा पुरवठा पूर्णपणे थांबला. परिणामी आता भारतासह जगभरात इंधनाचा तुटवडा निर्माण झाला आहे. या युद्धात साधारण 2000 पेक्षा जास्त लोकांचा मृत्यू झाला आहे. एकीकडे या युद्धात जग होरपळत असताना आता दुसरीकडे पाकिस्तान आणि अफगाणिस्तान यांच्यातील संघर्षही दिवसेंदिवस वाढतच आहे. मिळालेल्या ताज्या माहितीनुसार पाकिस्तानने अफगाणिस्तानवर मोठा आणि भीषण हल्ला केला आहे. या हल्ल्यामुळे आता अफगाणिस्तानही पाकिस्तानला जशास तसे उत्तर देण्याची शक्यता व्यक्त केली जात आहे. यामुळे हा संघर्ष आणखी पेटण्याची शक्यता निर्माण झाली आहे.
पाकिस्तानने नेमका कुठे हल्ला केला?
मिळालेल्या माहितीनुसार पाकिस्तानी लष्कराने दक्षिण अफगाणिस्तानातील कंधार प्रांतात हवाई हल्ला केला आहे. तालिबानच्या सैन्य ठिकाणांवर हा हल्ला करण्यात आल्याचे सांगितले जात आहे. सूत्रांच्या माहितीनुसार पाकिस्तानच्या या हल्ल्यात तालिबानचे सर्वोच्च नेते हिबतुल्लाह अखुंदजादा यांच्याशी संबंधित असलेली तांत्रिक उपकरणं तसेच इतर महत्त्वाचे सामान नष्ट करण्यात आले आहे. पाकिस्तानने केलेल्या आणखी एका हल्ल्यात कंधारमधील एका बोगद्याला लक्ष्य करण्यात आलं. या बोगद्याच्या मदतीने कथितपणे तालिबान आणि टीटीपीचे सदस्य पाकिस्तानविरोधात कारवाई करायचे. पाकिस्तानवर काही दिवसांपूर्वी झालेल्या हल्ल्यांना टीटीपी ही संघटना जबाबदार आहे, असा पाकिस्तान सरकारचा दावा आहे.
तालिबान सरकारने नेमकी काय माहिती दिली?
या हल्ल्याबाबत कंधार येथील स्थानिकांनी माहिती दिली आहे. आमच्या शहरावरून लढाऊ विमाने उडताना दिसत होती. रात्रभर स्फोटाचे आवाज येत होते, असे तेथील लोकांनी सांगितले आहे. दुसरीकडे तालिबान सरकारचे प्रवक्ते जिबुल्लाह मुजाहीद यांनी पाकिस्तानकडून हल्ला झाल्याचे सांगितले आहे. पाकिस्तानच्या हल्ल्यात व्यसनमुक्ती केंद्र तसेच एका रिकाम्या कंटेनरचे किरकोळ नुकसान झाले आहे.
दरम्यान, आता पाकिस्तानने केलेल्या या हल्ल्याला अफगाणिस्तान नेमके काय प्रत्युत्तर देणार, याकडे जगभराचे लक्ष लागले आहे.
