भारताच्या सीमेवर पाकिस्तानचा युद्धसराव, नेव्हीने थेट…समोर आलेल्या व्हिडीओ फुटेजमुळे चिंता वाढली!

Pakistan Navy Karrar Exercise : पाकिस्तानी नौदलाने भारतीय सीमेजवळ मोठी लष्करी कवायत घेतल्याची माहिती समोर आली आहे. पाकिस्तान नौदलाने या कवायतीचा व्हिडिओही जारी केला असून, त्यामध्ये फ्लीट ऑपरेशन, कॉम्बॅट ट्रेनिंग आणि युद्धासाठीची तयारी दाखवण्यात आली आहे. विशेष म्हणजे या व्हिडिओमध्ये भारत-पाकिस्तानमधील वादग्रस्त सर क्रीक परिसरातील दृश्यांचाही समावेश आहे. त्यामुळे या कवायतीच्या माध्यमातून भारताला थेट संदेश देण्याचा प्रयत्न केला जात आहे का, अशी चर्चा सुरू झाली आहे.

समोर आलेल्या व्हिडीओंमध्ये पाकिस्तान नौदलाचे प्रमुख अॅडमिरल नावीद अशरफ हे KARRAR – The Relentless Striker या कार्यक्रमातील सरावाची पाहणी करताना दिसत आहेत. सुरक्षा अधिकाऱ्यांच्या माहितीनुसार, 16 ते22 ऑगस्टदरम्यान बलुचिस्तान आणि सिंधच्या किनारी भागातील अनेक ठिकाणी या कवायती घेण्यात आल्या. यामध्ये पाकिस्तानी नौदलाची जहाजे, जवान तसेच मरीन कमांडोंनी सहभाग घेतला.

अरबी समुद्र आणि हिंदी महासागरावर लक्ष

CNN-News18 च्या वृत्तानुसार, या कवायतीचा उद्देश अरबी समुद्र आणि हिंदी महासागरातील संभाव्य समुद्री धोक्यांना सामोरे जाण्यासाठी पाकिस्तानची तयारी दाखवणे हा होता. या कवायतीमध्ये अबाबील एक्सरसाइजसह विविध नौदल सरावांचा समावेश असल्याचे सांगितले जात आहे. पाकिस्तान आपल्या लष्करी कमांड स्ट्रक्चरमध्ये मोठे बदल करण्याच्या तयारीत आहे. पाकिस्तानच्या संसदेत ऑगस्टमध्ये मंजूर करण्यात आलेला Defence Forces of Pakistan Act 2026 हा कायदा त्याचाच एक भाग आहे.

या नव्या व्यवस्थेनुसार चीफ ऑफ डिफेन्स फोर्सेस (CDF) यांच्या नेतृत्वाखाली तिन्ही सैन्यांमध्ये अधिक समन्वय साधण्यात येईल. तसेच फील्ड मार्शल असीम मुनीर यांच्याकडे लष्कर, नौदल आणि हवाई दलाच्या कमांड स्ट्रक्चरमध्ये सर्वाधिकार येतील.

दरम्यान, सर क्रीकसारख्या संवेदनशील भागाचा कवायतीच्या व्हिडिओमध्ये समावेश झाल्याने भारताच्या सुरक्षाव्यवस्थेचे आणि दोन्ही देशांमधील समुद्री सीमावादाचे मुद्दे पुन्हा चर्चेत आले आहेत. त्यामुळे भारत पाकिस्तानच्या या लष्करी सरावाकडे कसे पाहणार हे पाहणे महत्त्वाच ठऱणार आहे.