Russia Virus : रशियात रहस्यमयी जीवाणूची दहशत वाढली, आणखी एकाचा मृत्यू; जगाची चिंता वाढली!

Russia Virus Outbreak : सध्या रशियामध्ये एक रहस्यमयी आजार पसरला आहे. काही लोक याला प्लेगचं नाव देतायत. सायबेरियातील प्रयोगशाळेत एका महिलेचा मृत्यू झाल्यानंतर ही या रहस्यमयी आजाराची जगभरात चर्चा सुरू झालीय. महिलेच्या मृत्यूनंतर साधारण 100 पेक्षा जास्त लोकांना क्वारन्टाईन केल्याचं बोललं जातंय. विशेष म्हणजे हा आजार व्हायरसमुळे झाला की बॅक्टेरियाच्या संक्रमाणामुळे याबाबत अद्याप कोणतीही ठोस माहिती समोर आलेली नाही. परंतु 100 पेक्षा जास्त लोक क्वारन्टाईन असल्याने चिंता व्यक्त केली जातेय. दरम्यान अगोदरच जगाची धाकधूक वाढलेली असताना आता याच कथित प्लेगमुळे आणखी एका व्यक्तीचा मृत्यू झाल्याचं बोलं जातंय. म्हणजेच या रहस्यमयी प्लेगमुळे दोघांचा मृत्यू झाला आहे.

आणखी एका व्यक्तीचा मृत्यू?

रशिया या घटनेला दाबून टाकण्याच्या प्रयत्नात असल्याचा आरोप केला जातोय. स्थानिक माध्यमांनुसार सायबेरियात इरकुत्स्क येथे अँटी प्लेग रिसर्च इंस्टीट्यूट आहे. याच प्रयोगशाळेत अगोदर एका महिलेचा मृत्यू झाला होता. या महिलेच्या मृत्यूनंतर आता आठवड्याभराने आणखी एका व्यक्तीचा मृत्यू झाल्याचं बोललं जातंय. संबंधित प्रयोगशाळेत मृत्यू झालेल्या महिलेच्या हातात एक टेस्टट्यूब होती. या टेस्टट्यूबमध्ये काही जिवंत बॅक्टेरीया होते. ती टेस्टट्यूब फुटल्याने संबंधित महिलेचा मृत्यू झाला. तिचा मृत्यू 1 ऑक्टोबर रोजी झाला. ही घटना समोर येताच तिच्या संपर्कात असलेल्या शेकडो लोकांना क्वारन्टाईन करण्यात आलंय.

उपचारादरम्यान व्हेंटिलेटरवर ठेवलं पण…

सर्वात अगोदर मृत्यू पावलेली महिला ही येरसिनिया पेस्टिस नावाच्या जीवाणूच्या म्हणजेच बॅक्टेरियाच्या संपर्कात आली होती. तिला उपचारादरम्यान व्हेंटिलेटरवर ठेवण्यात आलं होतं. परंतु उपचारादरम्यान संबंधित महिलेचा मृत्यू झाला.

अमेरिकेने घेतली दखल

दरम्यान, आता हे प्रकरण समोर आल्यानंतर जगाची चिंता वाढली आहे. सध्या हा कथित प्लेगचा जीवाणू फक्त रशियाच्या एका प्रयोगशाळेपुरता मर्यादित आहे. परंतु विशेष काळजी न घेतल्यास ही साथ वाढणार का? असा सवाल उपस्थित केला जातोय. अमेरिकेनेही या प्रकरणाची गंभीर दखल घेत आम्ही परिस्थितीवर बारिक लक्ष ठेवून आहोत, असं सांगितलंय. त्यामुळे आता भविष्यात नेमकं काय होणार? हे पाहणं महत्त्वाचं ठरणार आहे.