मोजतबा खामेनेई जिवंत आहेत? इराणच्या राष्ट्रपतींनी सांगितली भेटीची संपूर्ण कहाणी; थेट पुरावेच दिले, म्हणाले…

इराणचे सर्वोच्च नेते मोजतबा खामेनी यांच्या प्रकृतीबद्दल अनेक चर्चा होत आहेत. याबाबत अमेरिकन आणि इस्रायली माध्यमांमध्ये त्यांच्या प्रकृतीबद्दल वारंवार प्रश्न उपस्थित केले गेले आहेत. अमेरिकेचे अध्यक्ष डोनाल्ड ट्रम्प यांनी स्वतः मोजतबा आजारी असल्याचे जाहीर केले आहे. यावर आता न्यूयॉर्कमध्ये दाखल झालेल्या इराणी राष्ट्रपतींनी अमेरिकन पत्रकारांना बोलावून मोजतबा यांच्या प्रकृतीची पुष्टी केली आहे.

यावेळी बोलताना इराणचे राष्ट्रपती पेझेश्कियान म्हणाले की, मी महिन्याभरापूर्वी मोजतबा यांना भेटलो. ते पूर्णपणे निरोगी आहेत. मी त्यांच्याशी सुमारे सात तास बोललो. आम्ही दोघेही एकाच ठिकाणी बसलो होतो. आम्ही अधूनमधून चाललोसुद्धा. त्यांच्या शरीराचे सर्व अवयव व्यवस्थित आहेत. त्यांचे हात कापले गेले किंवा इतर काही झाले, हे दावे खरे नाहीत. मी ते स्वतः पाहिले आहे.

ते म्हणाले की, इराणला युद्धासाठी भाग पाडले गेले आहे. आमच्या सर्वोच्च नेत्याची हत्या करण्यात आली. इराण ट्रम्प यांची हत्या घडवून आणू शकतो का, असे विचारले असता त्यांनी सांगितले की, तसे नाही. इराण कधीही तसा विचार करत नाही. हे निश्चितपणे अमेरिकेनेच घडवून आणले आहे. अमेरिकेने युद्धात आमचे मोठे नुकसान केले आहे. ते आणखी नुकसान करू शकते, पण इराणची जनता वॉशिंग्टनसमोर शरणागती पत्करणार नाही.

इराणचे दुसरे सर्वोच्च नेते अयातुल्ला अली खामेनी यांच्या हत्येनंतर ८ मार्च रोजी मोजतबा यांची इराणचे सर्वोच्च नेते म्हणून निवड झाली आहे. मतदानाचा अधिकार असलेल्या ५० धार्मिक नेत्यांनी मोजतबा यांची निवड केली. सर्वोच्च नेते झाल्यापासून मोजतबा भूमिगत आहेत. अमेरिकी किंवा इस्रायली गुप्तचर यंत्रणांना अद्याप मोजतबा यांच्याबद्दल कोणतीही माहिती मिळालेली नाही. मात्र इराणच्या सर्व प्रमुख निर्णयांमध्ये मोजतबा यांचा सहभाग असतो. सोशल मीडियावर त्याच्या नावाने निवेदने जारी केली जात आहेत.