SIM Card: तुमच्या नावावर दुसरं कोणीही SIM कार्ड घेतलंय का कसं कळणार? फक्त 1 मिनिटांत करा चेक

आजकाल बनावट सिम कार्डची समस्या मोठ्या प्रमाणावर पसरली आहे. कोणीतरी तुमच्या आधार कार्डचा गैरवापर करून तुमच्या नावावर सिम कार्ड मिळवू शकते. नंतर, जर त्या सिमचा वापर करून फसवणूक, घोटाळा किंवा इतर बेकायदेशीर कृत्ये घडली, तर पोलीस अनेकदा सर्वात आधी तुमच्याशी संपर्क साधतात. यामुळे अनावश्यक त्रास होऊ शकतो. असे प्रकार हल्ली रोज पाहायला मिळतात. यानंतर संबधित व्यक्तीचे मोठे नुकसान होते. सरकारने या समस्येवर एक सोपा उपाय उपलब्ध करून दिला आहे: TAFCOP पोर्टल (टेलिकॉम ॲनालिटिक्स फॉर फ्रॉड मॅनेजमेंट अँड कन्झ्युमर प्रोटेक्शन). हे दूरसंचार विभागाचे (DoT) अधिकृत पोर्टल आहे, जे संचार साथी अंतर्गत येते. या पोर्टलचा वापर करून, तुम्ही घरबसल्या तुमच्या नावावर किती सिम कार्ड सक्रिय आहेत हे तपासू शकता आणि कोणत्याही अज्ञात किंवा बनावट सिम कार्डची तात्काळ तक्रार करून ते निष्क्रिय करू शकता.

• तुमच्या मोबाईल किंवा कॉम्प्युटरवर ब्राउझर उघडा आणि अधिकृत वेबसाइटला भेट द्या: tafcop.sancharsaathi.gov.in
  होमपेजवर तुमचा 10 अंकी मोबाईल नंबर टाका (जो नंबर तुमच्या आधारशी जोडलेला आहे आणि OTP मिळवण्यासाठी वापरला जातो).
• स्क्रीनवर दिसणारा कॅप्चा कोड टाका आणि ‘व्हॅलिडेट कॅप्चा’ किंवा ‘सेंड ओटीपी’ वर क्लिक करा.
• तुम्हाला तुमच्या मोबाईलवर एक ओटीपी मिळेल. तो टाका आणि लॉग इन करा.
• तुम्ही लॉग इन केल्यावर, तुमच्या नावावर नोंदणीकृत असलेल्या सर्व सक्रिय मोबाईल क्रमांकांची यादी तुमच्या स्क्रीनवर दिसेल.

(गोपनीयतेच्या कारणास्तव, क्रमांकाचे फक्त पहिले दोन आणि शेवटचे चार अंक दिसतात.) येथे, तुमच्या नावावर किती सिम कार्ड नोंदणीकृत आहेत हे तुम्ही सहज पाहू शकता. भारतात, एक व्यक्ती आपल्या नावावर जास्तीत जास्त नऊ सिम कार्ड नोंदणीकृत ठेवू शकते (काही राज्यांमध्ये सहा). भारतात, जम्मू आणि काश्मीर, आसाम आणि ईशान्येकडील राज्ये/प्रदेशांमध्ये, एका व्यक्तीला त्याच्या/तिच्या ओळखपत्रावर जास्तीत जास्त फक्त 6 सिम कार्ड ठेवता येतात. उर्वरित राज्यांमध्ये तुम्ही 9 कार्ड वापरु शकतात.