नाशिकमध्ये लवकरच मेट्रो धावणार
आता नाशिक शहरातही लवकरच मेट्रो ट्रेन (Metro Train) धावणार आहे. नाशिकमध्ये सार्वजनिक जलद परिवहन व्यवस्था प्रणाली विकसित करण्यासाठी मेट्रो प्रकल्प राबविण्यास काल (28 ऑगस्ट) राज्य मंत्रिमंडळाच्या बैठकीत मंजुरी देण्यात आली.
नाशिक : आता नाशिक शहरातही लवकरच मेट्रो ट्रेन (Metro Train) धावणार आहे. नाशिकमध्ये सार्वजनिक जलद परिवहन व्यवस्था प्रणाली विकसित करण्यासाठी मेट्रो प्रकल्प राबविण्यास काल (28 ऑगस्ट) राज्य मंत्रिमंडळाच्या बैठकीत मंजुरी देण्यात आली. यामध्ये 33 किलोमीटर लांबीची मुख्य मार्गिका आणि 26 किलोमीटरच्या पूरक मार्गिकांचा समावेश असेल. वीज आणि बॅटरी या दोन्ही ऊर्जास्रोतांचा वापर या प्रकल्पात होत असल्याने तो देशात अभिनव ठरणार आहे.
नाशिक हे राज्यातील वेगाने विकसित होणारे शहर आहे. नाशिक महानगरातील गावेही झपाट्याने वाढत आहेत. नाशिक शहर आणि आसपासच्या प्रदेशाची गरज लक्षात घेता राज्य शासनाने अत्याधुनिक सार्वजनिक परिवहन प्रणालीच्या (MRTS – Mass Rapid Transit System) स्वरुपात परवडणारी, प्रदूषणमुक्त, हरित, ऊर्जा प्रेरक आणि विश्वसनीय अशी सार्वजनिक परिवहन प्रणाली निर्माण करण्याचा निर्णय घेतला आहे. नाशिकच्या सर्वसमावेशक वाहतूक आणि परिवहन आराखड्या आधारे तसेच शहरातील अरुंद, दाटीवाटीच्या रस्त्यांची गरज लक्षात घेऊन मेट्रो सेवा सुरु करण्याचा निर्णय घेण्यात आला आहे.
कसा असेल मार्ग?
दोन मुख्य मार्गिकांवर वीज आधारित मेट्रो यान चालवण्यात येतील. यामध्ये गंगापूर ते नाशिक रोड रेल्वे स्थानक ही मुख्य उन्नत मार्गिका क्रमांक 1 असेल. या मार्गाची लांबी 22.5 किमी राहणार असून त्यामध्ये 20 स्थानके असतील. तर गंगापूर ते मुंबई नाका ही मुख्य उन्नत मार्गिका क्रमांक 2 राहणार असून त्याची लांबी 10.5 किमी असेल व त्यात 10 स्थानके असतील.
या दोन मुख्य मार्गिकांची क्षमता वाढविण्यासाठी मुंबई नाका ते सातपूर कॉलनी असा 11.5 किमी आणि नाशिक स्थानक-नांदुरनाका मार्गे शिवाजीनगर असा 14.5 किमी असा एकूण 26 किमीचा पूरक मेट्रो मार्ग बांधण्यात येणार आहे. या पूरक रस्त्यांवर बॅटरीवर धावणारे मेट्रो यान चालविण्यात येतील. पूरक मार्गांमुळे मुख्य मेट्रो मार्गांवर पोहोचणे नागरिकांना सुलभ होईल. या संपूर्ण प्रकल्पाचा अंदाजित खर्च सुमारे 2100 कोटी इतका आहे.