Tejpal Wagh Wedding | अभिनेता-लेखक तेजपाल वाघ विवाहबंधनात

मुंबई : प्रसिद्ध मराठी अभिनेता, लेखक-दिग्दर्शक तेजपाल वाघ विवाहबंधनात अडकला. किरण घाडगेसोबत तेजपालने साताऱ्यात लगीनगाठ बांधली. (Marathi Actor Director Tejpal Wagh Wedding)

‘झी मराठी’ वाहिनीवर गाजलेल्या ‘लागीरं झालं जी’ या मालिकेच्या लेखनाची जबाबदारी तेजपालने सांभाळली होती. ही मालिका प्रेक्षकांच्या पसंतीस उतरल्याने यशात मोठा वाटा असलेला तेजपालही घराघरात पोहोचला.

साताऱ्यातील वाईमध्ये तेजपालचे ‘लॉकडाऊन वेडिंग’ झाले. या सोहळ्याला मोजकेच नातेवाईक आणि मित्रांना उपस्थिती लावता आली. ‘लागीरं झालं जी’ आणि ‘टोटल हुबलाक’ या मालिकेतील कलाकार लग्नाला हजर राहिल्याची माहिती आहे.

तेजपाल मूळ साताऱ्याच्या खटाव तालुक्यातील. ‘महाराष्ट्राचा सुपरस्टार’ या रिअ‍ॅलिटी शोच्या पहिल्या पर्वातून तेजपालने मनोरंजन विश्वात पाऊल ठेवलं.

महाराष्ट्र फेवरेट कोण, शेजारी शेजारी पक्के शेजारी अशा काही मालिकांचे लेखन त्याने केले. मात्र त्याला खरी ओळख मिळाली ‘लागीरं झालं जी’ या मालिकेने.

‘तुझं तू माझं मी – टीटीएमएम’, ओली की सुकी अशा काही सिनेमांचे लेखन तेजपालने केले आहे. पळशीची पिटी या पुरस्कारप्राप्त चित्रपटात त्याने लेखनाश भूमिकाही केली होती. तर ‘रंगा पतंगा’ शिवाय ‘मेकअप’ या सिनेमात त्याने अभिनेत्री रिंकू राजगुरु हिच्या भावाची व्यक्तिरेखा साकारली होती. (Marathi Actor Director Tejpal Wagh Wedding)

तेजपालच्या ‘वाघोबा प्रोडक्शन’ अंतर्गत ‘टोटल हुबलक’ ही मालिका सध्या सुरु असून त्याचे दिग्दर्शन तेजपाल करतो.

दहा दिवसांपूर्वीच ‘बिग बॉस मराठी’ या रिअ‍ॅलिटी शोमुळे घराघरात पोहोचलेली अभिनेत्री शर्मिष्ठा राऊतचा नुकताच साखरपुडा झाला. लॉकडाऊनचे काही नियम शिथिल झाल्याने नाशिकमध्ये कुटुंबीय आणि जवळच्या मित्रांच्या उपस्थितीत शर्मिष्ठाने साखरपुडा केला. इगतपुरीच्या रिसोर्टमध्ये हा समारंभ झाला.