शिवाजी पार्कची रोषणाई जनतेच्या पैशातून का? महिन्याच्या ‘कलेक्शन’मधून करा, मनसेचा टोला

मुंबई : छत्रपती शिवाजी महाराज पार्कला विद्युत रोषणाई करण्याचे श्रेय महाराष्ट्र नवनिर्माण सेनेला मिळू नये, यासाठी घाट घातला जात आहे. खरोखरच करायचं असेल, तर जनतेच्या पैशातून का? महिन्याला येण्याऱ्या ‘कलेक्शन’मधून करा, असा टोला मनसेचे सरचिटणीस संदीप देशपांडे यांनी लगावला आहे. (MNS Sandeep Deshpande Facebook Post on Shivaji Park Lighting)

संदीप देशपांडे यांचे आरोप काय?

“दरवर्षी लोकांना निखळ आनंद मिळावा, म्हणून राजसाहेब संपूर्ण छत्रपती शिवाजी महाराज पार्कला स्वखर्चाने विद्युत रोषणाई करत असतात. पण ते श्रेय मनसेला मिळू नये, म्हणून जनतेच्या पैशातून वर्षभर रोषणाई करण्याचा घाट घातला जात आहे. माणूस मोठा झाला की कोत्या मानसिकतेचा होते का? आणि खरोखरच करायचं आहे, तर जनतेच्या पैशातून का ? महिन्याला येण्याऱ्या “collection” मधून करा. असो शुभेच्छा” अशी उपरोधिक फेसबुक पोस्ट मनसेचे सरचिटणीस संदीप देशपांडे यांनी केली आहे.

उद्धव ठाकरे यांचे पत्र काय?

मुख्यमंत्री उद्धव ठाकरे यांनी जिल्हाधिकाऱ्यांना लिहिलेल्या पत्राचा फोटो संदीप देशपांडे यांनी शेअर केला आहे. “छत्रपती शिवाजी महाराज पार्कला अनेक ज्येष्ठ नागरिक फेरफटका मारण्यासाठी तसेच अनेक खेळाडू आणि इतर नागरिक धावण्यासाठी मैदानाच्या भोवतालच्या पाऊलवाटेचा/मार्गिकेचा वापर करत असतात. परंतु सदर ठिकाणी पुरेशी प्रकाशव्यवस्था नसल्यामुळे नागरिकांना असुविधा होते. सदर पाऊलवाटेच्या लगत अतिरिक्त विद्युत दिवे आणि इतर सुशोभिकरण करण्यासाठी माझ्या आमदार निधीतून सव्वा कोटी रुपये निधी मंजूर करण्यात यावा” असं पत्र उद्धव ठाकरे यांनी लिहिलं आहे.