पीकअपच्या भीषण अपघातात दुचाकीस्वारांनी दिला मृत्यूला चकवा, थरकाप उडवणारं CCTV फूटेज

जालना : भीषण अपघाताचे अनेक फूटेज आपण पाहिले असतील. असंच एक काळजाचा ठोका चुकवणारे अपघाताचे सीसीटीव्ही फुटेज समोर आले आहे. जालना औरंगाबाद रोडवर गाढे जळगाव फाट्यावर बुधवारी सायंकाळी 5 च्या सुमारास विचित्र अपघात पाहायला मिळाला. यामध्ये पीकअपचा अपघात होताना दुचाकीस्वार अगदी थोडक्यात वाचले आहेत.

औरंगाबादवरून जालन्याकडे जाणारा पीकअप चालकाचे नियंत्रण सुटल्याने डिव्हायडरवर जाऊन आदळला. दरम्यान समोरून येणारे एका दुचाकीवरील दोघेजण या अपघातात थोडक्यात बचावले आहेत. हे दृश्य CCTV मध्ये कैद झाले आहेत.

मिळालेल्या माहितीनुसार, या अपघातामध्ये कोणतीही जीवितहानी झाली नाही. सीसीटीव्ही व्हीडिओमध्ये तुम्ही पाहू शकता की कशा प्रकारे पीकअप हा डिव्हायडरच्या बाजूने कलंडताना बाजूने दुचाकी गेली. पण दुचाकीस्वाराने वेळीच गाडीचा वेग वाढवून पुढे गेल्याने ते थोडक्यात बचावले.

अपघाताची माहिती मिळताच पोलीस घटनास्थळी दाखल झाले असून रस्त्याच्या मधे असलेला अपघाती पीकअप बाजूला करण्याचं काम सुरू आहे. तर काही वेळ रस्त्यावर वाहतूक कोंडी झाली असल्याचंही सांगण्यात आलं.