गावरान झणझणीत गावरान मिरचीचा ठेचा; आजीच्या हातचा अस्सल गावरान मिरचीचा ठेचा असा बनवा
आजीच्या हातच्या चवीची आठवण करून देणारा हा गावरान मिरचीचा ठेचा घरी सहज बनवता येतो. गरम भाकरी, कांदा आणि भाजीसोबत हा ठेचा जेवणाची रंगतच वाढवतो.
आज्जीच्या हातचा ठेचा म्हटलं कि तोंडाला पाणी सुटल्याशिवाय राहत नाही. त्यात मिरचीचा ठेचा असेल तर आहाह बातच न्यारी. काय मग आली कि नाही आजीच्या हाताच्या मिरचीच्या ठेच्याची चव तोंडात. आजकाल त्या बाजारी मिरचीच्या चटण्यांना ती चव काय येणार म्हणा. चला तर मग आज्जीच्या हातची आठवण करून देणारी झणझणीत अस्सल गावरान मिरचीचा ठेचा कसा करायचा ते पाहूयात
साहित्य : 10 ते 12 गावरान हिरव्या मिरच्या, 6 ते 7 लसणाच्या मोठ्या पाकळ्या, अर्धी वाटी भाजलेले शेंगदाणे, 1 चमचा तीळ, 1 चमचा जीरे, मीठ, 1 ते 2 चमचे तेल, थोडी चिरलेली कोथिंबीर
सगळ्यात आधी हिरव्या मिरच्या स्वच्छ धुवून छान सुकवून घ्या. तवा गरम करून त्यावर थोडंसं तेल सोडा आणि त्यात हिरव्या मिरच्या आणि लसूण घाला. मंद आचेवर मिरच्या थोड्या भाजून घ्या. मिरच्यांना सालावर हलके काळसर डाग पडले आणि लसूण छान भाजली कि काढून घ्या.
आता त्या तव्यावर शेंगदाणे, जिरे आणि तीळ हलके भाजून घ्या. शेंगदाणे आधीच भाजलेले असतील तर फक्त थोडं गरम करा. जास्त पण भाजू नका नाहीतर चटणीला कडवट चव येईल.
मिक्सरमध्ये बारीक करण्याऐवजी खलबत्ता वापरा चव चांगली टिकेल. खलबत्यात आधी भाजलेल्या मिरच्या, लसूण आणि मीठ घाला. मिरच्या पूर्ण गुळगुळीत वाटू नका. थोड्या जाडसर राहू द्या
यानंतर त्यात भाजलेले शेंगदाणे, जिरे आणि तीळ घाला, पुन्हा सगळं एकत्र ठेचून घ्या.शेंगदाणे पूर्ण पेस्ट न करता थोडे जाडसर राहिले तर ठेच्याला छान कुरकुरीतपणा येतो.
शेवटी त्यात थोडी बारीक चिरलेली कोंथिंबीर आणि एक चमचा तेल घाला. सगळ नीट एकत्र करून ठेचा तयार करा. ज्यांना जास्त तिखट नको त्यांनी मिरच्यांचे प्रमाण कमी करा.
गरमागरम ज्वारीची किंवा बाजरीची भाकरी, कांदा,भाजी आणि मिरचीच्या झणझणीत ठेच्याचा आस्वाद घ्या.
