World Tourism Day : फिरायला जाण्याचा प्लॅन करताय? ट्रिपला निघण्यापूर्वी नक्की ‘या’ गोष्टी करा, प्रवास होईल आरामदायी

फिरायला जाण्याचा प्लॅन केला की सर्वात आधी उत्सुकता असते ती म्हणजे कुठे जायचे, काय पाहायचे आणि काय खायचे याची. मात्र, प्रवासाचा आनंद घेण्यासाठी योग्य तयारी करणेही तितकेच महत्त्वाचे आहे. बॅगेत आवश्यक वस्तू नसतील किंवा एखादी महत्त्वाची गोष्ट विसरली तर ऐन प्रवासात अडचण निर्माण होऊ शकते. त्यामुळे कपडे पॅक करण्यापासून ते महत्त्वाची कागदपत्रे सुरक्षित ठेवण्यापर्यंत काही छोट्या गोष्टींची काळजी घेतली तर प्रवास अधिक सोपा होऊ शकतो. २७ सप्टेंबर रोजी वर्ल्ड टुरिझम डे साजरा केला जातो. त्यानिमित्ताने ट्रिपला निघताना उपयोगी पडतील असे हे ट्रॅव्हल हॅक्स जाणून घेऊया.

प्रवासासाठी बॅग भरताना कपडे एकावर एक फोल्ड करून ठेवल्यास बॅगेत जागा कमी पडू शकते. त्याऐवजी कपडे व्यवस्थित रोल करून पॅकिंग केल्यास तुलनेने कमी जागेत अधिक कपडे ठेवता येतात. त्यामुळे एकाच बॅगेत आवश्यक कपडे व्यवस्थित मावू शकतात.

हॉटेलचे लोकेशन गुगल मॅपवर सेव्ह करा

नवीन शहरात किंवा अनोळखी ठिकाणी फिरताना हॉटेलचा रस्ता लक्षात राहीलच असे नाही. त्यामुळे हॉटेलमधून बाहेर पडण्यापूर्वी त्याचे लोकेशन Google Maps वर सेव्ह करून ठेवणे फायदेशीर ठरू शकते. परतताना रस्ता चुकला तरी सेव्ह केलेल्या लोकेशनच्या मदतीने हॉटेलपर्यंत पोहोचणे सोपे होईल.

हॉटेल रूमचे फोटो काढून ठेवा

हॉटेलमधून बाहेर पडताना रूमचे आणि आपल्या सामानाचे एक-दोन फोटो काढून ठेवणे उपयोगी ठरू शकते. रूममध्ये परतल्यानंतर सामानाची स्थिती वेगळी दिसल्यास किंवा काही वस्तूंबाबत गैरसमज झाल्यास आधीची स्थिती दाखवण्यासाठी हे फोटो उपयोगी पडू शकतात.

बॅगेत ड्राय स्नॅक्स ठेवा

बस, ट्रेन किंवा कारने लांबचा प्रवास करणार असाल तर बॅगेत काही ड्राय स्नॅक्स ठेवणे उत्तम. प्रवासादरम्यान वेळेवर जेवण मिळाले नाही किंवा भूक लागली तर हे स्नॅक्स उपयोगी पडू शकतात. त्यामुळे प्रवासात ड्राय स्नॅक्स घ्यायला विसरू नका.

कॅश सोबत ठेवायला विसरू नका

आजकाल बहुतांश ठिकाणी डिजिटल पेमेंटची सुविधा उपलब्ध असली तरी प्रवासात काही प्रमाणात रोख रक्कम सोबत ठेवणे उपयोगी ठरते. विशेषतः इंटरनेट कनेक्शन किंवा डिजिटल पेमेंटची सुविधा उपलब्ध नसलेल्या ठिकाणी कॅशची गरज पडू शकते. शक्य असल्यास संपूर्ण रोख रक्कम एकाच ठिकाणी न ठेवता वेगवेगळ्या ठिकाणी सुरक्षित ठेवणे अधिक योग्य ठरेल.

ट्रिपची माहिती घरच्यांना द्या

तुम्ही कुठे जाणार आहात, कुठे राहणार आहात आणि कोणत्या ठिकाणी फिरणार आहात, याची माहिती घरातील एखाद्या विश्वासू व्यक्तीला नक्की द्या. विशेषतः एकट्याने प्रवास करत असाल तर ही माहिती घरच्यांकडे असणे महत्त्वाचे आहे. आपत्कालीन परिस्थितीत तुमच्याशी संपर्क साधणे किंवा तुमची माहिती शोधणे त्यांना सोपे जाऊ शकते.

पॉवर बँक आणि ट्रॅव्हल अॅडॉप्टर ठेवा

प्रवासात मोबाईलचा वापर मॅप, तिकीट, बुकिंग आणि संपर्कासाठी मोठ्या प्रमाणात होतो. त्यामुळे पूर्ण चार्ज केलेली पॉवर बँक सोबत ठेवणे फायदेशीर ठरते. परदेशात किंवा वेगवेगळ्या प्रकारचे प्लग वापरल्या जाणाऱ्या ठिकाणी जाणार असाल तर युनिव्हर्सल ट्रॅव्हल अॅडॉप्टरही बॅगेत ठेवणे उपयोगी ठरेल.

वेट वाइप्स ठेवा

प्रवासात प्रत्येक वेळी हात धुण्यासाठी पाणी किंवा स्वच्छतागृह उपलब्ध असेलच असे नाही. अशावेळी वेट वाइप्स उपयोगी पडू शकतात. हात किंवा छोट्या वस्तू स्वच्छ करण्यासाठी ते सहज वापरता येतात. त्यामुळे बॅगेत वेट वाइप्सचे छोटे पॅक ठेवणे सोयीचे ठरते.

बॅग आणि महत्त्वाच्या कागदपत्रांचे फोटो काढा

प्रवासाला निघण्यापूर्वी आपल्या बॅगेचा फोटो काढून ठेवणे उपयोगी ठरू शकते. तसेच पासपोर्ट, तिकीट किंवा इतर महत्त्वाच्या कागदपत्रांच्या सुरक्षित डिजिटल प्रती ठेवणेही फायदेशीर आहे. सामान हरवले किंवा कागदपत्रांची गरज अचानक भासली तर या प्रती उपयोगी पडू शकतात.

सोबत पाण्याची बॉटल ठेवा

प्रवासात शरीर हायड्रेटेड ठेवणे महत्त्वाचे असते. त्यामुळे शक्य असल्यास रियूजेबल पाण्याची बॉटल सोबत ठेवा. ती पुन्हा भरून वापरता येत असल्याने प्रवासात सोयीची ठरते.