सावधान! या रक्तगटांच्या लोकांना हृदयविकाराचा असतो जास्त धोका, संशोधन काय सांगते?
आज काल हृदयविकाराचा झटका येण्याचे प्रमाण वाढले आहे. पण कधीकधी काही विशिष्ठ रक्तगट असलेल्या व्यक्तींना हृदयविकाराचा झटका येण्याची शक्यता जास्त असते. चला जाणून घेऊया त्याविषयी...
आजकाल हृदयविकार ही एक मोठी आणि गंभीर समस्या बनली आहे. हृदयविकाराचा झटका हा उच्च कोलेस्टेरॉल, मधुमेह यांसारखे आजार वेगाने वाढत आहेत. हृदयविकाराचा झटका मुख्यतः रक्तप्रवाहात अडथळा आल्याने येतो, ज्याचे प्रमुख कारण रक्तातील कोलेस्टेरॉल वाढणे असते. पण हे एकमेव कारण नाही – खराब जीवनशैली, ताणतणाव, चिंता आणि इतर घटकही यात महत्त्वाची भूमिका बजावतात.
जगभरात हृदयविकार हे मृत्यूचे प्रमुख कारणांपैकी एक आहे. तुम्हाला हृदयविकाराचा धोका आहे की नाही हे जाणून घेणे महत्त्वाचे आहे. लक्षणे नीट समजली नाहीत किंवा योग्य माहिती नसेल तर हे धोकादायक ठरू शकते. आश्चर्याची गोष्ट म्हणजे, तुमचा रक्तगट आणि हृदयाच्या आरोग्याचा खूप जवळचा संबंध असतो, असे अनेक वैज्ञानिक अभ्यास सांगतात.
तज्ज्ञ आणि अभ्यास काय सांगतात?
अनेक आंतरराष्ट्रीय अभ्यासांनुसार, रक्तगट O नसलेल्या लोकांना (म्हणजे A, B किंवा AB) हृदयविकाराचा धोका जास्त असतो. संशोधकांनी ABO रक्तगट आणि हृदयविकार यांच्यातील संबंध शोधला आहे.
-रक्तगट A किंवा B असलेल्या लोकांना हृदयविकाराचा झटका येण्याचा धोका रक्तगट O च्या तुलनेत सुमारे 8% जास्त असतो (अमेरिकन हार्ट असोसिएशनच्या अभ्यासानुसार).
-रक्तगट AB असलेल्या लोकांना हृदयविकाराचा धोका सर्वाधिक असतो – काही अभ्यासांमध्ये तो O पेक्षा 23% जास्त दिसून आला आहे.
-रक्तगट B असलेल्या लोकांना मायोकार्डियल इन्फेक्शन (हार्ट अटॅक) चा धोका इतरांपेक्षा जास्त असल्याचे काही संशोधनात आढळले आहे.
-रक्तगट A असलेल्या लोकांमध्ये हृदय अपयशाचा (हार्ट फेल्युअर) धोका O च्या तुलनेत 11% जास्त असू शकतो.
सामान्यतः नॉन-O रक्तगट (A, B, AB) असलेल्या लोकांमध्ये रक्त गोठण्याशी संबंधित प्रोटीन (जसे von Willebrand factor आणि factor VIII) ची पातळी जास्त असते, ज्यामुळे रक्तवाहिन्यांमध्ये अडथळा येण्याची शक्यता वाढते.
कोणाला सर्वाधिक धोका?
-रक्तगट AB – सर्वाधिक धोका (काही अभ्यासात 23% पर्यंत जास्त).
-रक्तगट B – हृदयविकाराचा धोका लक्षणीय वाढलेला.
-रक्तगट A – O पेक्षा जास्त, पण AB आणि B पेक्षा कमी.
-रक्तगट O – हृदयविकाराचा धोका तुलनेने कमी.
हृदयविकार हळूहळू विकसित होतो, म्हणून वेळीच सावध होणे गरजेचे आहे. नियमित व्यायाम, संतुलित आहार, ताण कमी करणे, धूम्रपान टाळणे आणि नियमित तपासणी करणे यामुळे धोका कमी करता येऊ शकतो. तुमचा रक्तगट काहीही असला तरी, निरोगी जीवनशैली हाच सर्वोत्तम बचाव आहे!
