भरपूर ऊन खाताय, तरी Vitamin D कमीच? शरीरातील या 6 गोष्टी असू शकतात कारणीभूत!

Vitamin D Deficiency

ऑक्टोबर हीट असो किंवा उन्हाळ्याचा कडक उन्हाळा, भारतात सूर्यप्रकाश मुबलक असतानाही अनेकांच्या शरीरात व्हिटॅमिन डीची कमतरता आढळते. व्हिटॅमिन डी हाडे मजबूत ठेवण्यासाठी आणि शरीरात कॅल्शियमचे शोषण होण्यासाठी महत्त्वाचे आहे. मात्र, केवळ उन्हात बसूनही त्याची पातळी पुरेशी वाढेलच असे नाही. तुमच्या दैनंदिन सवयी, आहार आणि काही आरोग्यविषयक कारणांमुळे व्हिटॅमिन डीची पातळी कमी राहू शकते.

खिडकीतून येणारे ऊन

घरात किंवा कार्यालयात खिडकीजवळ बसून ऊन घेतल्याने व्हिटॅमिन डी पुरेशा प्रमाणात तयार होईलच असे नाही. कारण खिडकीची काच व्हिटॅमिन डी निर्मितीसाठी आवश्यक UVB किरणांना अडवते.

त्वचेतील मेलॅनिनचे प्रमाण

त्वचेतील मेलॅनिन हे नैसर्गिक रंगद्रव्य सूर्याच्या अतिनील किरणांपासून संरक्षण देते. मात्र, गडद त्वचेमध्ये सूर्यप्रकाशाच्या मदतीने व्हिटॅमिन डी तयार होण्याची प्रक्रिया तुलनेने कमी कार्यक्षम असू शकते.

प्रदूषण आणि धुरके

हवेतील प्रदूषण आणि धुरक्यामुळे त्वचेपर्यंत पोहोचणाऱ्या UVB किरणांचे प्रमाण कमी होऊ शकते. त्यामुळे सूर्यप्रकाश उपलब्ध असूनही शरीरात व्हिटॅमिन डी तयार होण्यावर परिणाम होण्याची शक्यता असते.

आहारात व्हिटॅमिन डीची कमतरता

चरबीयुक्त मासे, अंड्याचा बलक आणि व्हिटॅमिन डी मिसळलेले पदार्थ हे त्याचे काही स्रोत आहेत. आहारातून पुरेसे व्हिटॅमिन डी न मिळाल्यास कमतरता वाढू शकते.

वाढते वय आणि लठ्ठपणा

वाढत्या वयानुसार त्वचेची व्हिटॅमिन डी तयार करण्याची क्षमता कमी होते. लठ्ठपणामध्येही व्हिटॅमिन डीची रक्तातील उपलब्धता कमी असू शकते.

शरीरातील शोषणाची समस्या

सीलिअॅक किंवा क्रोन्ससारखे काही पचनसंस्थेचे आजार, तसेच यकृत आणि मूत्रपिंडांचे विकार यांमुळे व्हिटॅमिन डीचे शोषण किंवा त्याचे सक्रिय स्वरूपात रूपांतर प्रभावित होऊ शकते.

व्हिटॅमिन डीची कमतरता असल्याचा संशय असल्यास डॉक्टरांच्या सल्ल्याने तपासणी करून घ्या. स्वतःहून जास्त डोसची सप्लिमेंट्स घेऊ नका. आवश्यकतेनुसार डॉक्टर योग्य उपचार सुचवू शकतात.