मनोज जरांगे पाळीव कुत्रा; आंदोलनाच्या नावाखाली… अजय बारस्करांच्या नव्या आरोपाने खळबळ

मराठा आरक्षण आंदोलनाचे नेते मनोज जरांगे पाटील यांच्यावर अजय महाराज बारस्कर यांनी पुन्हा एकदा गंभीर आरोप केले आहेत. मनोज जरांगे आणि त्यांच्या निकटवर्तीयांचा अवैध वाळू उत्खननाच्या व्यवहारांशी संबंध असल्याचा दावा बारस्कर यांनी केला आहे. तसेच आंदोलनाच्या माध्यमातून आर्थिक व्यवहार आणि मालमत्ता खरेदी केल्याचेही त्यांनी आरोप करत म्हटले आहे. यानंतर आता खळबळ उडाली आहे.

अजय महाराज बारस्कर यांनी मनोज जरांगे यांच्या जवळचे सहकारी संजय नानासाहेब कटारे यांच्यासह काही व्यक्तींचा वाळू उत्खनन प्रकरणाशी संबंध असल्याचा आरोप केला आहे. मनोज जरांगे यांचे मेहुणे विलास खेडकर यांचेही नाव या प्रकरणात असल्याचा दावा त्यांनी केला आहे. तसेच तत्कालीन तहसीलदार चंद्रकांत शेळके यांनी वाळू उत्खनन प्रकरणातील दंडाच्या कारवाईत सवलत दिल्याचा आरोपही बारस्कर यांनी केला.

संजय कटारे यांच्याशी संबंधित अंबड तालुक्यातील साष्टपिंपळगाव आणि डोमलगाव परिसरातील गोदावरी नदीपात्रातील सुमारे २ हजार ब्रास अवैध वाळू उत्खनन प्रकरणात प्रशासकीय कारवाई झाली आहे. कटारे यांना दंडाच्या कारवाईतून वगळणारा तत्कालीन तहसीलदारांचा आदेश रद्द करण्यात आला आहे. ₹4 कोटी 90 लाख 72 हजार 200 रुपयांचा दंड पुन्हा कायम करण्यात आला आहे.

याच पार्श्वभूमीवर बारस्कर यांनी मनोज जरांगे यांना लक्ष्य करत ते संघर्षयोद्धा नसून टेंडरयोद्धा आहेत, असा आरोप केला. आंदोलनाच्या नावाखाली पैसे घेऊन जमीन खरेदी केल्याचाही त्यांनी दावा केला. तसेच मनोज जरांगे यांना मिळालेल्या डिफेंडर वाहनावरूनही त्यांनी सवाल उपस्थित केला आहे. हे वाहन नेमके कोणी दिले, असा प्रश्न त्यांनी यापूर्वीही उपस्थित केला होता.

अजय महाराज बारस्कर यांनी मनोज जरांगेंवर सरकारचा पाळीव कुत्रा अशी टीकाही केली आहे. तसेच सांगलीतील व्यापारी भोसले यांच्या माध्यमातून कथित आर्थिक व्यवहार झाल्याचा आणि कंपन्यांवर पडलेल्या छाप्यांनंतर पैसे ॲम्ब्युलन्समधून जरांगेंपर्यंत पोहोचल्याचा आरोपही त्यांनी केला. या दाव्यांची स्वतंत्र पुष्टी उपलब्ध वृत्तांमध्ये झालेली नाही. बारस्करांनी यापूर्वी मनोज जरांगे आणि त्यांच्या सहकाऱ्यांविरोधात ईडीकडे तक्रार केल्याचा दावा केला आहे. त्यावर मनोज जरांगेंच्या सहकाऱ्यांनी चौकशीला सामोरे जाण्याची तयारी दर्शवत आरोप फेटाळले आहेत.