पोलिस, वैद्यकीय अधिकारी-कर्मचाऱ्यांवर हल्ले केलेत, तर…; अजित पवारांचा दम

मुंबई : कोरोना प्रतिबंधक कर्तव्य बजावणाऱ्या पोलिस, वैद्यकीय अधिकारी, कर्मचाऱ्यांवरील हल्ल्याच्या घटना कदापि सहन केल्या जाणार नाहीत. असे हल्ले करणाऱ्यांवर गुन्हा दाखल करुन कायद्यानुसार कारवाई केली जाईल, असा इशारा उपमुख्यमंत्री अजित पवार यांनी दिला आहे. (Ajit Pawar on Attacks on Police Doctors)

कोरोनाविरुद्धच्या लढ्यात कर्तव्य बजावणारे पोलीस, वैद्यकीय अधिकारी, कर्मचाऱ्यांवरील हल्ल्याच्या घटना अजिबात सहन केल्या जाणार नाहीत, असे हल्ले करणाऱ्यांवर गुन्हा दाखल करुन कायदेशीर कारवाई केली जाईल. वसई, बीड, मालेगावसारख्या ठिकाणी अशा घटना समोर आल्या आहेत. त्यामुळे या लढ्याला धक्का बसत आहे, अशा शब्दात अजित पवारांनी दम भरला.

मालेगाव मध्य मतदारसंघाचे एमआयएम आमदार मुफ्ती इस्माईल यांच्यावर गुन्हा दाखल करण्यात आला आहे. कलम 353 नुसार आमदारासह इतर दहा जणांवर मालेगाव शहर पोलीस ठाण्यात गुन्हा दाखल करण्यात आला. काल रात्री आमदार मुफ्ती यांच्या समक्ष समर्थकांनी सामान्य रुग्णायलातील वैद्यकीय अधीक्षकासह इतर डॉक्टर आणि कर्मचाऱ्यांना शिवीगाळ करत धक्काबुक्की आणि मारहाण केली होती.

दरम्यान, संचारबंदी असली तरी जीवनावश्यक वस्तुंचा पुरवठा नियमित सुरु आहे. तरीही बाजारात खरेदीसाठी होत असलेली गर्दी चिंताजनक आहे. जीवनावश्यक वस्तू घरपोच किंवा सोसायटी परिसरात उपलब्ध करण्याबाबत स्थानिक स्वराज्य संस्थांनी नियोजन करावे, अशा सूचना दिल्या आहेत. वाई, बारामती शहरांत अशी व्यवस्था केल्याची माहिती अजित पवारांनी दिली.

शहरात एकाकी राहत असलेले ज्येष्ठ नागरिक, विद्यार्थी, रस्त्यावर राहणारे गरीब, बेघर यांच्या भोजनाची सोय करण्यासाठी समाजाने, स्वयंसेवी संस्थांनी पुढे यावं, असं आवाहन अजित पवारांनी ट्विटरवरुन केलं. पोलिस आणि नागरिक दोघांनीही स्वयंशिस्त, संयम पाळावा, असंही ते म्हणाले.

कोरोना प्रतिबंधक कर्तव्य बजावणाऱ्या पोलिस, वैद्यकीय अधिकारी, कर्मचाऱ्यांवरील हल्ल्याच्या घटना कदापी सहन केल्या जाणार नाहीत. असे हल्ले करणाऱ्यांवर गुन्हा दाखल करुन कायद्यानुसार कारवाई केली जाईल असा इशारा मा. उपमुख्यमंत्री ना. @AjitPawarSpeaks यांनी दिलाय.#CoronaUpdates #COVID19 pic.twitter.com/Xs4xz4qnuT

— NCP (@NCPspeaks) March 26, 2020

(Ajit Pawar on Attacks on Police Doctors)