दादांच्या जागी आम्ही आजही…; सुनेत्रा पवारांच्या शपथविधीवर रोहित पवार स्पष्टच बोलले, म्हणाले 13 दिवस…

rohit pawar sunetra pawar

महाराष्ट्राचे उपमुख्यमंत्री अजित पवार यांचे बारामती येथे झालेल्या एका भीषण विमान अपघातात दुर्दैवी निधन झाले. मुंबईहून बारामतीकडे येत असताना सकाळी ८.४६ च्या सुमारास तांत्रिक बिघाडामुळे त्यांचे विमान धावपट्टीपासून काही अंतरावर एका शेतात कोसळले. जमिनीवर आदळताच विमानाचा भीषण स्फोट झाला. या हृदयद्रावक घटनेत अजित पवार यांच्यासह विमानातील वैमानिक आणि कर्मचारी अशा एकूण ५ जणांचा जागीच मृत्यू झाला. यात क्रू-मेंबर पिंकी माळी यांचाही समावेश होता. या घटनेमुळे संपूर्ण महाराष्ट्रावर शोककळा पसरली आहे. आता राष्ट्रवादी काँग्रेस शरद पवार गटाचे आमदार रोहित पवार यांनी नुकतंच माळी कुटुंबाची भेट घेतली. त्यानंतर त्यांनी त्यांच्या भावना व्यक्त केल्या.

रोहित पवारांनी घेतली क्रू-मेंबर पिंकी माळींच्या कुटुंबियांची भेट 

एका टॅक्सी चालकाने आपल्या मुलीच्या शिक्षणासाठी स्वतःची खोली विकली, तिला मोठं केलं आणि ती मुलगी आपल्या घराची जबाबदारी पेलत असतानाच काळाने तिच्यावर झडप घातली, हे पाहून मन सुन्न झालंय,” असे राष्ट्रवादी काँग्रेसचे शरद पवार गटाचे आमदार रोहित पवार म्हणाले. बारामती येथे झालेल्या विमान अपघातात मृत्युमुखी पडलेल्या क्रू-मेंबर पिंकी माळी यांच्या कुटुंबियांची मुंबईत भेट घेतल्यानंतर ते बोलत होते. पिंकी यांचे वडील मुंबईत टॅक्सी चालवून घराचा गाडा ओढतात. पिंकीला उच्च शिक्षण मिळावे आणि तिचे करिअर घडावे यासाठी त्यांनी आपले राहते घरही विकले होते. पिंकीनेही अनेक नामांकित कंपन्यांमध्ये काम करून आपल्या वडिलांच्या कष्टाचे चीज केले होते. ज्यावेळी घराची परिस्थिती सावरू लागली होती, नेमक्या त्याच वेळी ही दुर्दैवी घटना घडली, असे रोहित पवार म्हणाले.

पवार कुटुंब आणि राष्ट्रवादी परिवार त्यांच्या सोबत

पिंकी माळी यांचा भाऊ अद्याप शिकत आहे. त्याची शिक्षणाची जिद्द पाहून आणि कुटुंबाची आर्थिक परिस्थिती लक्षात घेता, रोहित पवार यांनी त्याच्या नोकरीसाठी पूर्ण ताकदीने प्रयत्न करण्याचे आश्वासन दिले आहे. भावाने कॅप्टन व्हावे अशी पिंकीची इच्छा होती, मात्र त्याचं शिक्षण अजून पूर्ण व्हायचंय. या कठीण काळात पवार कुटुंब आणि राष्ट्रवादी परिवार त्यांच्या सोबत आहे, असेही रोहित पवारांनी स्पष्ट केले.

आम्ही आजही सुनेत्रा वहिनींनाच पाहतो

यावेळी रोहित पवारांना अजित पवार यांच्या निधनानंतर रिक्त झालेल्या पदावर सुनेत्रा पवार यांनी उपमुख्यमंत्री म्हणून शपथ घेतली, याबद्दल विचारले असता त्यांनी सविस्तर भाष्य केले. सुनेत्रा वहिनींनी शपथ घेतली याचा आनंद नक्कीच आहे. मात्र सध्या संपूर्ण पवार कुटुंब आणि महाराष्ट्र मोठ्या दुःखात आहे. अशा परिस्थितीत आम्ही त्यांना शुभेच्छा देऊ शकत नाही. दादांच्या जागी आम्ही आजही सुनेत्रा वहिनींनाच पाहतो. त्यांनी पद स्वीकारणे हा त्यांच्या पक्षाचा निर्णय आहे, असे रोहित पवार म्हणाले.

१३ दिवसांनी बोलेन

यावेळी राजकीय विलीनीकरण आणि इतर वादांवर सध्या बोलणे योग्य नसल्याचे रोहित पवारांनी स्पष्ट केले. पवार कुटुंब सध्या या धक्क्यातून सावरण्याचा प्रयत्न करत आहे. त्यामुळे राजकीय आरोप-प्रत्यारोप किंवा पक्षांतर्गत घडामोडींवर मी आजपासून १३ दिवसांनंतरच अधिकृतपणे बोलेन, असे रोहित पवार यांनी सांगितले. सध्या केवळ सांत्वन आणि मदतीला प्राधान्य असल्याचे रोहित पवार यांनी नमूद केले.