Shirdi Saibaba : शिर्डीत साईबाबांच्या प्रसादाच्या दरासंदर्भात महत्वाची अपडेट

सध्या साखरेचे दर वाढत चालले आहेत. त्याची झळ शिर्डीतील प्रसादाला सुद्धा बसण्याची शक्यता आहे. साईबाबांच्या दर्शनासाठी देश-विदेशातून येणाऱ्या भाविकांची संख्या मोठी आहे. त्यांना आता प्रसादासाठीही अधिक पैसे मोजावे लागू शकतात. साखरेच्या वाढत्या दराचा थेट परिणाम शिर्डीतील पेढे आणि इतर प्रसादाच्या किमतींवर होण्याची शक्यता आहे. होलसेल मार्केटमध्ये साखरेच्या दरात तब्बल 30 टक्क्यांपर्यंत वाढ झाल्याने शिर्डीतील प्रसाद विक्रेते व्यापारी दरवाढीचा विचार करतायत. तर दुसरीकडे साईबाबा संस्थानने लाडू विक्री दरात सध्या वाढ केलेली नाही.

शिर्डीत साईबाबांच्या दर्शनानंतर प्रसाद म्हणून पेढे आणि इतर मिठाई खरेदी करणाऱ्या भाविकांची संख्या मोठी आहे. शिर्डी शहरात सहाशेहून अधिक प्रसाद विक्रेते आणि व्यावसायिक असून, सध्या शिर्डी नगरपंचायतीने निश्चित केलेल्या दरानुसारच प्रसादाची विक्री सुरू आहे. मात्र,होलसेल बाजारात साखरेच्या दरात मोठी वाढ झाल्याने प्रसाद निर्मितीचा खर्चही वाढला आहे. त्यामुळे वाढलेल्या खर्चाचा भार व्यापाऱ्यांवर पडत असून, आगामी काही दिवसांत प्रसादाच्या दरवाढीसंदर्भात व्यापाऱ्यांची बैठक घेण्यात येणार असल्याची माहिती व्यापारी असोशिएनचे रवि गोंदकर यांनी दिलीय.

शिर्डी हे देशातील एक मोठ तीर्थक्षेत्र

शिर्डी हे देशातील एक मोठ तीर्थक्षेत्र आहे. दरवर्षी भारतासह जगभरातून कोट्यवधी भाविक साई दर्शनासाठी शिर्डीत येत असतात. काही खास सणांच्यावेळी उदहारणार्थ गुरुपौर्णिमा, दसरा यावेळी शिर्डीत भाविकांची मोठी गर्दी असते. साईबाबांवर अपार श्रद्धा असणारे कोट्यवधी भक्तगण आहेत. आता भाविकांना वाढत्या साखर दरांमुळे अजून जास्त किंमतीला प्रसाद खरेदी करावा लागू शकतो.