आई, तुला जेलमध्ये का टाकलं होतं? मुलं विचारत होते, Video नवनीत राणा भावूक… जय जय श्रीरामच्या घोषणा
Navneet rana Emotional | एरवी उद्धव ठाकरे यांना आक्रमक होत इशारा देणाऱ्या नवनीत राणा आज अमरावतीत भाषण करताना भावूक झाल्या. महाविकास आघाडी सरकारमधील जेलच्या आठवणी सांगताना त्यांच्या डोळ्यात अश्रू आले.
स्वप्निल उमप, अमरावती : रामाचं, हनुमानाचं नाव घेते म्हणून मला 14 दिवसच काय 14 वर्ष जरी जेलमध्ये टाकलं असतं तर नवनीत राणा (Navneet Rana), रवी राणा (Ravi Rana) राहिले असते. तुरुंगवास भोगला असता. पण कोर्टात हजर झाले तेव्हा कळलं आमच्यावर देशद्रोहाचा गुन्हा दाखल केलाय, हे धक्कादायक होतं. माझ्यासारख्या महिला प्रतिनिधीला तुरुंगात पाणीसुद्धा दिलं नाही. मी शंभरवेळा आवाज दिले तेव्हा एकदा ऐकलं जायचं… मला आणखी एक महिना तुरुंगात ठेवण्याचा त्यांचा प्लॅन होता.. माझी लहान मुलंही विचारत होती, आई तुला जेलमध्ये का टाकलं?… खासदार नवनीत राणा भावूक झाल्या. बोलता बोलता भावना उचंबळून आल्या. हातात माईक, पण शब्द थांबले. डोळ्यातून अश्रू वाहू लागले. समोर हजारो भाविक, कार्यकर्ते. अखेर आवंढा गिळला. स्टेजकडे पाठ फिरवली. अश्रू पुसले आणि पुढील भाषण सुरु केलं..
प्रसंग होता नवनीत राणा यांनी अमरावतीत आय़ोजित केलेल्या हनुमान चालिसा पठन कार्यक्रमाचा. अमरावतीच्या खासदार नवनीत राणा आणि रवी राणा दाम्पत्याने आज हनुमान जयंतनिमित्त अमरावतीत भव्य कार्यक्रमाचं आयोजन केलं. हजारो भाविकांनी एकत्र येऊन या कार्यक्रमात २१ वेळा हनुमान चालिसाचं पठन केलं. महाविकास आघाडी सरकारच्या काळात नवनीत राणा यांनी हनुमान चालिसासाठी केलेल्या आंदोलनाच्या आठवणी नवनीत राणा यांनी सांगितल्या. या कार्यक्रमात स्टेजवर बोलताना मुलांनी विचारलेल्या प्रश्नावरून त्या भावूक झाल्या.
नवनीत राणा यांच्या डोळ्यातून अश्रू वाहू लागले. अखेर स्टेजकडे पाठ करून त्यांनी डोळे पुसले. सभागृहात जय जय श्रीरामच्या घोषणा सुरु झाल्या… अन् पुढचं भाषण सुरु झालं…
त्या पुढे म्हणाल्या, मी लढण्यासाठी मुंबईत पाऊल ठेवलं होतं. माझा विश्वास ते तोडू शकले नाहीत. खूप अत्याचार केले. प्रत्येक दिवशी मी 101 वेळा हनुमान चालिसा पठन केलं. माझ्या विश्वासाला तडा जाऊ देऊ नका, ही प्रार्थना करत होते. तिथेच मी प्रण केला, बाहेर आल्यावर १११ फुटाची हनुमानाची मूर्ती उभी करेन. उद्धव ठाकरे, तुम्ही सोन्याचं ताट वापरत असाल तर गरीबांचा देवावरचा विश्वास जास्त आहे. नवनीत राणा आणि रवी राणा यांच्या पाठिशी देवाचा आशीर्वाद आहे, ते मी त्यांना करून दाखवलं, अशा शब्दात नवनीत राणा यांनी उद्धव ठाकरे यांना सुनावलं…
अमरावतीत नवनीत राणा आणि रवी राणा यांच्या पुढाकारातून 111 फूट उंच हनुमानाची मूर्ती उभारली जात आहे. आज हनुमान जयंती आणि नवनीत राणा यांचा वाढदिवस या दोन्हीचं मुहूर्त साधून हनुमान चालिसा पठनाचा भव्य कार्यक्रम आयोजित करण्यात आला.