Amravati Crime | कंत्राटदारास काढायचे होते कामाचे बिल, अभियंत्यासह लिपिक अडकले एसीबीच्या जाळ्यात
अमरावतीमध्ये एका कंत्राटदारास कामाचे बिल काढायचे होते. त्यासाठी त्याला अभियंत्याने लाचेची मागणी केली. कंत्राटदाराने एसीबीकडे तक्रार केली. या प्रकरणात अभियंता आणि लिपिक एसीबीच्या जाळ्यात अडकले.
अमरावती : अमरावतीच्या सार्वजनिक बांधकाम (Public Works) (आदिवासी) विभागाच्या एका कार्यकारी अभियंत्यासह वरिष्ठ लिपिकास रंगेहाथ अटक करण्यात आली. एका बांधकाम कंत्राटदाराचे कामाचे बिल काढून दिल्याच्या मोबदल्यात लाच मागितली होती. अभियंता सुनील रामदास कळमकर व वरिष्ठ लिपिक राजेश जनार्दन गुडधे अशी अटक करण्यात आलेल्या लाचखोरांची नावे आहेत. या प्रकरणातील तक्रारकर्ते यांचे मामा शासकीय कंत्राटदार (Government Contractor) आहेत. त्यांनी केलेल्या एका कामाचे बिल काढून दिल्याच्या मोबदल्यात कार्यकारी अभियंता सुनील कळमकर (Engineer Sunil Kalmakar) यांनी 50 हजार व वरिष्ठ लिपिक राजेश गुडधे यांनी 10 हजार रुपयांच्या लाचेची मागणी केली होती.
एसीबीच्या पथकाने रचला सापळा
यासंदर्भात लाचलुचपत प्रतिबंधक विभागाकडे तक्रार करण्यात आली होती. तक्रारीच्या अनुषंगाने पडताळणी करून लाच लुचपत प्रतिबंधक विभागाच्या पथकाने काल सायंकाळी कार्यालयातच सापळा रचला. यावेळी तक्रारकर्त्याच्या मामाकडून 50 हजारांची लाच स्वीकारताना कार्यकारी अभियंता सुनील कळमकर व पाच हजारांची लाच स्वीकारताना वरिष्ठ लिपिक राजेश गुडधे यांना रंगेहाथ अटक केली. अमरावतीमध्ये एका कंत्राटदारास कामाचे बिल काढायचे होते. त्यासाठी त्याला अभियंत्याने लाचेची मागणी केली. कंत्राटदाराने एसीबीकडे तक्रार केली. या प्रकरणात अभियंता आणि लिपिक एसीबीच्या जाळ्यात अडकले.
