‘लाईट बंद म्हणजे…’ महिलांच्या शोषणासाठी खरात वापरायचा कोडवर्ड, हादरवणारी माहिती समोर

भोंदूबाबा आणि बलात्कार प्रकरणातील आरोपी अशोक खरातबाबत दररोज नवनवीन माहिती समोर येत आहे. आतापर्यंत खरातवर 8 वेगवेगळे गुन्हे दाखल झाले आहेत. खरातविरोधातील आरोपांची चौकशी करण्यासाठी स्थापन करण्यात आलेल्या विशेष तपास पथकाकडून (SIT) त्यांची कसून चौकशी सुरू आहे. या चौकशीतून वेगवेगळे खुलासे होत आहेत. समोर आलेल्या माहितीनुसार खरात आपल्या कार्यालयात वेगवेगळ्या गुन्ह्यांसाठी एक खास कोडवर्ड वापरत होता, ज्याबाबत त्याच्या कर्मचाऱ्यांना माहिती होती. याबाबत सविस्तर माहिती जाणून घेऊयात.

खरात वापरायचा खास कोडवर्ड

तपासातून समोर आलेल्या माहितीनुसार, कॅप्टन खरात जेव्हा केबिनमध्ये एखाद्या महिलेला शुद्धीकरणासाठी बोलवत असे, तेव्हा तो केबिनमधील झुंबराची लाईट बंद करत असे. याचा अर्थ असा होता की कोणालाही केबिनमध्ये एंट्री नाही. याच काळात तो महिलांचे लैंगिक शोषण करत असायचा. तपासातील माहितीनुसार, महिलांचे लैंगिक शोषण करण्यासाठी ‘शुद्धीकरण’ हा शब्द कोड म्हणून वापरला जात होता. व्यवसायात यश आणि अडथळे दूर करण्याच्या नावाखाली लोकांची फसवणूक करण्यासाठी अवतार पूजा हा कोड शब्द वापरला जात होता.

जादुई तुर्की मध

अशोक खरातच्या तपासात आणखी एक धक्कादायक बाब समोर आली आहे. आरोपी खरात भक्तांना जादुई तुर्की मध देत होता. हा मध तुर्कीतील गुहेतून आणलेला दुर्मिळ जादुई मध असल्याचे सांगून लोकांना तो 9 लाख रुपये प्रति किलो दराने विकत होता. सध्या सुरु असलेल्या तपासादरम्यान, तपास पथकाला 50 हून अधिक लोकांनी फोन करून खरातच्या काळ्या कारनाम्यांची माहिती दिली आहे. त्यामुळे खरातचा पाय आणखी खोलात गेला आहे.

आमदाराची बायको खरातच्या संपर्कात असल्याची माहिती

भोंदू अशोक खरात याचे कारनामे, संपत्तीचा तपशील याबाबत कसून माहिती गोळा केली जात आहे. याचदरम्यान नवी अपडेट समोर येताना दिसत आहे. अशोक खरातच्या ‘विशेष भक्त परिवारात’ एका आमदाराच्या पत्नीचा समावेश असल्याची चर्चा आहे. अनेक राजकीय नेते, मंत्री, राजकारणी हे भोंदू बाबाच्या दरबारात हजेरी लावण्यासाठी जात होते. याचाच एक भाग म्हणून एका आमदाराची पत्नी आहे, तिचं नाव समोर येत आहे. ती सातत्याने या भोंदूबाबाच्या संपर्कात होती. नाशिकमधील त्याच्या कॅनडा कॉर्नर परिसरात असलेल्या कार्यालयात ती जात होती अशी माहिती समोर आली आहे.