खासदार बजरंग सोनवणे यांना धक्का, थेट जवळच्या व्यक्तीवर गुन्हा दाखल, विलास घुले हत्या प्रकरण..

बीडच्या केज येथील विलास घुले प्रकरणात दररोज धक्कादायक खुलासे होताना दिसत आहेत. या प्रकरणात थेट बीडचे खासदार बजरंग सोनवणे यांचा मुलगा साैरभ बजरंग सोनवणे याचे नाव पुढे आल्याने खळबळ उडाली. आरोपी ज्यावेळी विलास घुले याला मारहाण करत होते, त्यावेळी ते साैरभ बजरंग सोनवणे याचे नाव घेत होते. विलास घुलेच्या हत्येनंतर त्याच्या कुटुंबियांनी बजरंग सोनवणे आणि त्यांच्या मुलावर गंभीर आरोप केली. मात्र, पोलिस तक्रार घेत नसल्याने थेट नातेवाईकांनी मृतदेह केज पोलिस ठाण्यासमोर ठेवत आंदोलन केले. ज्यानंतर याची दखल मुख्यमंत्री देवेंद्र फडणवीस यांनी घेतली आणि या हत्येमध्ये कोणीही असून त्याला वाचवले जाणार नसल्याचे स्पष्ट केले. त्यानंतर आंदोलकांनी आंदोलन मागे घेतले. या प्रकरणात दररोज वेगवेगळे दावे आणि खुलासे केले जात आहेत. दोन गटात सुरू असलेले भांडण सोडवण्यासाठी गेलेल्या विलास घुले गेला असता त्याची हत्या केली.

त्यानंतर एका महिलेचे नाव या प्रकरणात पुढे आले. या प्रकरणात एसआयटी देखील नियुक्त करण्यात आली आहे. या प्रकरणाचा एसआयटीकडून तपास सुरू आहे. साैरभ बजरंग सोनवणे याची एसआयटीकडून चाैकशी करण्यात आली. मात्र, यादरम्यान हातात हात घालून गप्पा मारताचा एक फोटो व्हायरल झाला आणि खरोखरच साैरभ सोनवणे याच्यावर कारवाई होईल का? असा प्रश्न उपस्थित करण्यात आला.

या प्रकरणात आता मोठ्या घडामोडी घडताना दिसत आहेत. विलास घुले याचा भाऊ रमेश घुलेच्या तक्रारीवरून खासदार सोनवणेंचे समर्थक बाळासाहेब पाथरकर विरोधात केज पोलीस ठाण्यात गुन्हा दाखल करण्यात आला. विलास घुले हत्या प्रकरणात रमेश घुलेंनी खासदार बजरंग सोनवणे यांच्या मुलावर गंभीर आरोप केले होते. मात्र, पोलीस सूत्रांकडून मिळालेल्या माहितीनुसार, सौरव सोनवणे यांच्या विरोधात कुठलाही पुरावा न आढळल्याने जबाब घेऊन त्यांना सोडून देण्यात आले.

यानंतर रमेश घुले यांच्या विरोधात बीड जिल्ह्यात दाखल असलेल्या गुन्ह्यांबाबत दोन दिवसांपूर्वी बाळासाहेब पाथरकर यांनी वाच्यता करत रमेश घुलेंवर एमपीडीए अंतर्गत कारवाई करा, अशी मागणी केली होती. यानंतर आपली बाळासाहेब पाथरकर यांनी बदनामी केल्याची तक्रार रमेश घुले यांनी दिली आहे. या तक्रारीवरून केज पोलीस ठाण्यात बाळासाहेब पाथरकर यांच्या विरोधात गुन्हा दाखल करण्यात आला आहे.