बाबा माझं भाग्य की, तुमचा संघर्षाचा वारसा मला मिळाला; गोपीनाथ मुंडेंच्या पुण्यतिथीदिनी पंकजा भावूक

बीड : भाजपचे दिवंगत नेते गोपीनाथ मुंडे यांची आज 9 वी पुण्यतिथी आहे. त्यानिमित्त भाजप नेत्या पंकजा मुंडे यांनी सोशल मीडियावर एक व्हीडिओ शेअर करत आपल्या भावना व्यक्त केल्या आहेत. यात त्यांनी गोपीनाथ मुंडे यांच्याबद्दलच्या आठवणींना उजाळा दिला आहे. बाबा, आमच्या श्वासाश्वासात तुम्ही आहात, असं पंकजा मुंडे या व्हीडिओमध्ये म्हणाल्या आहेत.

श्वास चालू असेल तर माणूस जिवंत आहे, असं म्हणतात. पण श्वास थांबल्यानंतर देखील लोकांच्या आठवणीत राहाणं हे लोकांचं प्रेम आहे. आता नऊ वर्षे होईन गेली तरी प्रत्येकाला तुमचे लोकनेते आणि माझे बाबा गोपीनाथराव मुंडेसाहेब. आज त्यांना जाईन नऊ वर्षे झाली तरी आपल्याला त्यांची पदोपदी आठवण येते ही किती मोठी पुण्याई आहे. माझं भाग्य आहे की माझा जन्म त्यांच्या पोटी झाला. त्याहूनही मला माझं भाग्य वाटतं ते म्हणजे त्यांच्या संघर्षाचा वारसा मला मिळाला. स्वाभिमानाने संघर्ष करत मुंडेसाहेब लढले. तसंच मीदेखील लढत राहील हे मी माझं कर्तव्य समजते. तेमी शेवटच्या श्वासापर्यंत पूर्ण करत राहील, असं पंकजा मुंडे या व्हीडिओमध्ये म्हणाल्या आहे.

आठवण साहेबांची !!, असं म्हणत पंकजा मुंडे यांनी एक व्हीडिओ शेअर केला आहे.

देशाच्या पंतप्रधानांपासून ते तळागाळातील कार्यकर्त्यांपर्यंत, कोणत्याही पक्षाच्या नेत्याने गोपीनाथराव मुंडे यांची आठवण काढली नाही, असं झालं नाही. त्यांच्या आठवणी सांगणाऱ्या लोकांना ऐकलं की बळ मिळतं, असं पंकजा मुंडे म्हणाल्या आहेत.

आठवण साहेबांची !!#GopinathGad pic.twitter.com/EcLq46HmJG

— Pankaja Gopinath Munde (@Pankajamunde) June 2, 2023

पंकजा मुंडे यांनी शेअर केलेल्या व्हीडिओमध्ये पंतप्रधान नरेंद्र मोदी, केंद्रीय गृहमंत्री अमित शाह, जे पी नड्डा यांच्यासह विरोधी पक्षातील नेत्यांच्याही प्रतिक्रिया आहेत.

भव्य जनसागर हा गोपीनाथराव मुंडे यांच्या तपस्येचं फळ आहे, असं पंतप्रधान मोदी म्हणाले आहेत. तर भाजपच्या यशात गोपीनाथ मुंडे यांचं मोठं योगदान आहे, असं अमित शाह म्हणालेत.

गोपीनाथराव मुंडे असते तर माझे अडीच वर्षे जेलमध्ये गेले नसते. पहाडासारखा हा माझा भाऊ माझ्या पाठीशी उभा राहिला असता, असं म्हणत छगन भुजबळ यांनी आपल्या भावना व्यक्त केल्या आहेत. यावेळी छगन भुजबळ गहिवरल्याचं पाहायला मिळालं.