राज ठाकरे माफी मागा, अन्यथा शिवाजी पार्कात येऊन…भीम आर्मीचा इशारा; साहिल वाकोडे प्रकरणातील भूमिकेवर आक्षेप!
आम्ही शैक्षणिक ताणाचा मुद्दा नाकारत नाही; मात्र शैक्षणिक ताण आणि जातीय भेदभाव हे स्वतंत्र मुद्दे असून दोन्हींची चौकशी होणे आवश्यक आहे. साहिलच्या कुटुंबीयांनी उपस्थित केलेल्या प्रश्नांनाही समान गांभीर्याने घेतले पाहिजे. साहिल वाकोडे हा महाराष्ट्राच्या मातीतला तरुण होता. त्याच्या मृत्यूचे सत्य तपासातून समोर आले पाहिजे आणि त्याला न्याय मिळाला पाहिजे, अशी मागणी भीम आर्मीने केली.
Sahil Wakode IIT Pawai : आयआयटी पवईमध्ये शिकत असलेल्या साहिल वाकोडेचे प्रकरण सध्या राज्यभरात चर्चेच्या केंद्रस्थानी आहे. साहिल वाकोडने टोकाचे पाऊल उचलून आपले जीवन संपले. आमच्या मुलाचा मानसिक छळ चालू होता. त्याला जातीवाचक शिवीगाळ केली जात होती, असा आरोप त्यांच्या पालकांनी केलाय. दुसरीकडे या घटनेचे राजकीय पडसादही उमटत आहेत. मनसेचे प्रमुख राज ठाकरे यांनी या प्रकरणावर भाष्य केलं. जाती-पातीच्या राजकारणात गुरफटून जाऊ नये, असे आवाहन त्यांनी केले. आता त्यांच्या या भूमिकेचा भीम आर्मीने निषेध केलाय.
जातीय छळाच्या गंभीर आरोपांना केवळ…
IIT मुंबईतील विद्यार्थी साहिल वाकोडे यांच्या मृत्यूच्या प्रकरणावर मनसे प्रमुख राज ठाकरे यांनी मांडलेल्या भूमिकेचा भीम आर्मी महाराष्ट्रतर्फे तीव्र निषेध करण्यात आलाय. राज ठाकरे यांनी शिक्षणव्यवस्थेतील ताण, मानसिक आरोग्य आणि विद्यार्थ्यांच्या प्रश्नांवर भाष्य केले आहे. मात्र, साहिलच्या कुटुंबीयांनी केलेल्या जातीय छळाच्या गंभीर आरोपांना केवळ ‘जातीय राजकारण’ म्हणून बाजूला काढणे योग्य नाही. या आरोपांवर गुन्हा दाखल असून तपास सुरू आहे. त्यामुळे तपास पूर्ण होण्यापूर्वी जातीय छळाच्या आरोपांना नाकारण्याऐवजी त्यांची निष्पक्ष आणि पारदर्शक चौकशी झाली पाहिजे, असे मत भीम आर्मीने व्यक्त केले आहे.
मृत्यूचे सत्य तपासातून समोर आले पाहिजे
आम्ही शैक्षणिक ताणाचा मुद्दा नाकारत नाही; मात्र शैक्षणिक ताण आणि जातीय भेदभाव हे स्वतंत्र मुद्दे असून दोन्हींची चौकशी होणे आवश्यक आहे. साहिलच्या कुटुंबीयांनी उपस्थित केलेल्या प्रश्नांनाही समान गांभीर्याने घेतले पाहिजे. साहिल वाकोडे हा महाराष्ट्राच्या मातीतला तरुण होता. त्याच्या मृत्यूचे सत्य तपासातून समोर आले पाहिजे आणि त्याला न्याय मिळाला पाहिजे, अशी मागणी भीम आर्मीने केली.
राज ठाकरेंनी माफी मागावी
राज ठाकरे यांनी आपल्या भूमिकेचा पुनर्विचार करून साहिल वाकोडे यांच्या कुटुंबीयांची माफी मागावी आणि दोन दिवसांत आपली भूमिका स्पष्ट करावी, अशी भीम आर्मी महाराष्ट्रची मागणी आहे. अन्यथा भीम आर्मी महाराष्ट्रच्या वतीने शिवाजी पार्क येथील मनसे कार्यालयाबाहेर तीव्र आंदोलन करण्यात येईल, असा इशारा भीम आर्मीने दिलाय.
