BJP on Manoj Jarange Audio Clip: राजकारणात सर्वात मोठा बॉम्ब फोडणाऱ्या जरांगेंच्या ऑडिओ क्लिपवर भाजपची पहिली प्रतिक्रिया

महाराष्ट्राच्या राजकारणात मनोज जरांगे पाटील यांनी समोर आणलेल्या ऑडिओ क्लिपमुळे नव्या वादाला तोंड फुटलं आहे. मराठा आरक्षण आंदोलन, 500 कोटी रुपयांचा उल्लेख आणि विधानसभा निवडणुकीच्या संदर्भामुळे या प्रकरणाची चर्चा सुरू झाली आहे. या पार्श्वभूमीवर भाजप प्रवक्ते नवनाथ बन यांनी ऑडिओ क्लिपची सत्यता तपासण्याची मागणी केली आहे. ही क्लिप खरी आहे, एआयच्या (AI) मदतीने तयार केली आहे की तिच्यात फेरफार करण्यात आला आहे, याचा सखोल तपास होणं आवश्यक असल्याचं त्यांनी म्हटलं आहे. मुख्यमंत्री देवेंद्र फडणवीस यांनी या प्रकरणात लक्ष घालावं आणि गृहखातं, पोलिसांच्या माध्यमातून सत्य समोर आणावं, अशी भूमिका बन यांनी मांडली.

सध्याच्या काळात AI तंत्रज्ञानाच्या मदतीने एखाद्या व्यक्तीच्या आवाजाची नक्कल करणं शक्य झालं आहे. त्यामुळे केवळ ऑडिओ क्लिप ऐकून त्यातील संभाषण खरं असल्याचा निष्कर्ष काढणं योग्य ठरणार नाही. अमिताभ बच्चन, राज कपूर आणि अन्य प्रसिद्ध व्यक्तींच्या आवाजाची नक्कल करून लोकांची दिशाभूल केली जाते. त्यामुळे संबंधित ऑडिओ क्लिपची सत्यता तांत्रिक पद्धतीने पडताळली पाहिजे. क्लिपमधील आवाज कोणाचे आहेत, संभाषण नेमकं कधीचं आहे आणि त्यात काही बदल करण्यात आले आहेत का, या प्रश्नांची उत्तरं तपासातून मिळणं आवश्यक आहे. यासाठी गृहखातं, पोलिस आणि फॉरेन्सिक प्रयोगशाळेची मदत घेता येईल. गरज पडल्यास विशेष तपास पथक (SIT) स्थापन करण्याचाही विचार करता येईल, असं बन यांनी म्हटलंय.

नवनाथ बन यांनी या ऑडिओ क्लिपच्या वेळेबाबतही प्रश्न उपस्थित केले आहेत. त्यांच्या मते, संभाषणाचे संदर्भ पाहता ही क्लिप विधानसभा निवडणुकीपूर्वीची असल्याचं दिसतंय. त्यामुळे क्लिपचा कालावधी, त्यातील संभाषणाचा संदर्भ आणि संबंधित व्यक्तींची ओळख निश्चित करणं महत्त्वाचं असल्याचं त्यांनी नमूद केलं. क्लिप खरी आहे की बनावट, याचा निर्णय तांत्रिक पुरावे आणि तपासाच्या निष्कर्षांवरच व्हायला हवा, अशी भूमिका बन यांनी मांडली.

मनोज जरांगे पाटील यांनी नारायणगडावरील दसरा मेळाव्यात उपमुख्यमंत्री एकनाथ शिंदे यांच्याबाबत 500 कोटी रुपयांचा उल्लेख करत प्रश्न उपस्थित केले होते. भाजपच्या नेत्यांना आपल्याला 500 कोटी रुपये दिल्याचं सांगण्यात आल्याची चर्चा असल्याचा दावा त्यांनी केला होता. या दाव्यानंतर राज्याच्या राजकारणात चर्चा सुरू झाली. मात्र एकनाथ शिंदे यांनी हे आरोप स्पष्टपणे फेटाळले आहेत. आपण कोणाकडून 500 कोटी रुपये घेतले नाहीत आणि कोणालाही दिलेही नाहीत, असं त्यांनी सांगितलं. जरांगे यांच्याकडे आरोपांसंदर्भात पुरावे असतील, तर त्यांनी ते संबंधित यंत्रणांकडे द्यावेत आणि या प्रकरणाची चौकशी व्हावी, अशी भूमिकाही शिंदे यांनी मांडली.

नवनाथ बन यांनी ऑडिओ क्लिपमधील नावांवरही प्रश्न उपस्थित केले. “ऑडिओ क्लिपमध्ये दरेकर आणि डावखरे यांची नावे घेतली जात असल्याचं समोर येत आहे. मात्र, अशा प्रकारची उघड व्यूहरचना कोणताही राजकीय पक्ष करत नसतो. त्यामुळे या क्लिपची सत्यता तपासणं अधिक गरजेचं आहे,” असं मत त्यांनी व्यक्त केलं. या संपूर्ण प्रकरणाचा सखोल तपास होण्याची आवश्यकता असल्याचंही त्यांनी सांगितलं. याशिवाय, आणखी काही ऑडिओ क्लिप असल्याचा दावा केला जात असेल, तर संबंधितांनी त्या माध्यमांसमोर आणाव्यात किंवा न्यायालयात सादर कराव्यात, असं आवाहन त्यांनी केलं. क्लिप खरी आहे की खोटी, याबाबत केवळ अंदाज बांधण्याऐवजी पोलिसांच्या माध्यमातून तिची तांत्रिक तपासणी होणं आवश्यक आहे. पोलिसांकडून तपास पूर्ण होऊन निष्कर्ष समोर येईपर्यंत या क्लिपमधील संभाषणाची सत्यता निश्चित करता येणार नाही, असंही त्यांनी स्पष्ट केले.