कबुतरांमुळे माझ्या आईचा मृत्यू, कबुतरखाने नॅशनल पार्कमध्ये हलवा, आमदार राम कदम यांची मागणी

मुंबईसह राज्यातील अनेक शहरांमध्ये कबुतरखाने आहेत, या ठिकाणी लोक कबुतरांना खाद्य टाकतात. अशातच आता भाजप आमदार राम कदम यांनी मुंबईतील कबुतरांमुळे वाढणाऱ्या आरोग्याच्या धोक्याचा मुद्दा विधानसभेत उपस्थित केला. या मुद्द्यावर बोलताना त्यांनी आपल्या आईचे निधन फुफ्फुसांच्या इंटरस्टिशियल लंग डिसीज या गंभीर आजारामुळे झाल्याचे विधान केले. कबुतरांच्या विष्ठेमुळे हवेत पसरणाऱ्या घटकांमुळे हा आजार पसरतो असं म्हणत कबुतरखाने शहराबाहेरील नॅशनल पार्कमध्ये हलवण्याची मागणी त्यांनी केली. याबाबत सविस्तर माहिती जाणून घेऊयात.

कबुतरांमुळे माझ्या आईचा मृत्यू झाला – राम कदम

राज्य विधिमंडळाचे पावसाळी अधिवेशन सध्या सुरू आहे. आज राम कदम यांनी याबाबतचा मुद्दा विधानसभेत उपस्थित केला. यानंतर बोलताना राम कदम यांनी म्हटले की,’माझ्या आईचा मृत्यू हा कबुतरांमुळे झाला होता, कबुतरांमुळे होणारे आजार अतिशय घातक आहे. माझ्या आईला ILD (इंटरस्टिशियल लंग डिसीज) हा फुफ्फुसांचा गंभीर आजार झाला होता. या आजारावर ठोस औषध उपलब्ध नाही. या आजाराच्या उपचारादरम्यान रुग्णाला सतत ऑक्सिजनवर ठेवावे लागते आणि आजार वाढत गेल्यानंतर प्रचंड वेदना सहन कराव्या लागतात. माझी आई सलग 15-15 मिनिटे खोकायची. इतका वेळ अखंड खोकल्यामुळे ती बेशुद्ध पडायची. हीच अवस्था अनेक ILD रुग्णांची असते.

कबुतरखाने मुंबईच्या बाहेर नॅशनल पार्कमध्ये हलवा – कदम

पुढे बोलताना कदम यांनी म्हटले की, कबुतरांमुळे होणारे आजार अतिशय घातक आहे. त्यामुळे शहरी वसतीमध्ये असलेले कबुतरखाने हे शहराच्या बाहेर ठेवले पाहिजे अशी मागणी मी केली आहे आणि त्यासंदर्भात एक तज्ञ लोकांची कमिटी तयार करावी असे निर्देश अध्यक्षांनी दिले आहेत. मी या विषयात कधीच राजकारण करणार नाही, कबुतर हा एक जीव आहे, त्यामुळे त्यांचा जीव देखील महत्त्वाचा आहे. त्यामुळे कबुतरखाने हे मुंबईच्या बाहेर नॅशनल पार्कला किंवा फिल्मसिटीला हलवण्यात यावे अशी मागणी केली आहे. आजार हा काय धर्म, जाती बघून होत नाही, त्यामुळे या गोष्टीच्या संदर्भात ही आमची भूमिका आहे.’