BMC : मुंबई महानगरपालिकेत कोण बनणार विरोधी पक्ष नेता ? आज होणार घोषणा
मुंबई महानगरपालिकेच्या निवडणुकीनंतर महापौर आणि उपमहापौरपदाची निवड झाली आहे. आता सर्वांचे लक्ष सभागृहनेते, विरोधी पक्षनेते आणि विविध समित्यांच्या सदस्य निवडीकडे लागले आहे. आज (१६ फेब्रुवारी) या महत्त्वाच्या पदांची घोषणा होणार आहे. स्थायी, शिक्षण, सुधार आणि बेस्ट समित्यांचे सदस्यही आज जाहीर होतील.
गेल्या महिन्यात राज्यातील 29 महापालिकांची निवडणूक झाली. बहुचर्चित मुंबई महापालिकेचाही त्यात समावेश होता. अख्ख्या राज्याचं लक्ष लागलेल्या या निवडणुकीत महायुती वि. ठाकरे असा प्रामुख्याने सामना होता. यामध्ये भाजप-शिवसेना शिदे गटाने बहुमताचा आकडा पार करत विजय मिळवला. त्यानंकर गेल्या आठवड्यात मुंबई महानगरपालिकेच्या महापौरपदी भारतीय जनता पक्षाच्या रितू तावडे तर उपमहापौर म्हणून शिवसेनेचे संजय घाडी यांच्याकडे पदाचा कार्यभार सोपवण्यात आला. या सर्व बहुचर्चित कार्यक्रमांनंतर आता सर्वांचे लक्ष सभागृहनेते आणि विरोधी पक्षनेते यांच्या निवडीकडे लागलं आहे.
या दोन्ही पदांची घोषणा आज ( सोमवार 16 फेब्रुवारी) महापालिका सभागृहात होणार आहे. म्हणजेच मुंबई महानगर पालिकेत विरोधी पक्ष नेता कोण? याची आज अधिकृत घोषणा होणार असून सभागृहनेत्याचीही निवड पार पडणार आहे. एवढंच नव्हे तर समित्यांमधील सदस्यांची देखील घोषणा आज केली जाणार असल्याची माहिती समोर आली आहे. स्थायी समिती, शिक्षण समिती, सुधार समिती आणि बेस्ट समिती सदस्यांचीही नावे देखील आज जाहीर होतील
मुंबई महानगर पालिकेत विरोधी पक्ष नेता कोण ?
मुंबई महापालिकेत महापौर आणि उपमहापौरपदाच्या निवडणुकीनंतर, दुसरी विशेष सभा आज, सोमवार 16 फेब्रुवारी रोजी होणार आहे. या विशेष सभेत विरोधी पक्षनेते आणि सभागृहनेते पद यांची नावं जाहीर करण्यात येणार आहेत. सत्ताधारी पक्षाचे गटनेते यांची पर्यायाने सभागृहनेते पदी निवड होते, तर विरोधी पक्षाच्या गटनेत्याची निवड ही विरोधी पक्षनेतेपदी होते. विरोधी पक्षाच्या सर्वाधिक नगरसेवक असलेल्या गटनेत्याची निवड ही विरोधी पक्षनेतेपदी होईल.
त्यामुळे या निवडणुकीत सर्वत जास्त जागा जिंकलेल्या भारतीय जनता पक्षाचे गटनेते गणेश खणकर यांची सभागृहनेते पदी निवड होईल. आणि विरोधी पक्षाच्या, म्हणजे ठाकरेंच्या शिवसेनेच्या गटनेत्या किशोरी पेडणेकर यांच्या नावाची घोषणा विरोधी पक्षनेतेपदी होईल असं समजतं. दोन्ही पक्षांकडून महापौरांना जे पत्र प्राप्त झालं आहे, त्यानुसार, महापौर या दोन्ही गटनेत्यांची अनुक्रमे सभागृहनेते आणि विरोधी पक्षनेते म्हणून नावे जाहीर करणार आहेत.
समित्यांमधील सदस्यांची देखील आज घोषणा
दरम्यान आज समित्यांमधील सदस्यांची देखील घोषणा केली जाणार आहे. मुंबई महानगरपालिकेत स्थायी, शिक्षण, सुधार आणि बेस्ट या चार वैधानिक समित्या असून या चारही समित्यांवरील नियुक्त सदस्यांची नावे आज जाहीर होतील. या सदस्यांच्या नावाची घोषणा झाल्यानंतर येत्या 20 फेब्रुवारीला शिक्षण आणि स्थायी समिती अध्यक्षपदाची निवडणूक होईल. त्यासाठी 18 फेब्रुवारी रोजी दोन्ही समित्यांच्या अध्यक्षपदासाठी उमेदवारी अर्ज महापालिका सचिवांना सादर केले जातील.
कोणत्या पक्षाचे किती सदस्य ?
स्थायी समिती ( एकूण सदस्य 26 ) – भाजप – 10, शिवसेना शिंदे – 04 , शिवसेना ठाकरे – 07, काँग्रेस – 03, मनसे – 01, एमआयएम – 01
सुधार समिती (एकूण 26) – भाजप – 10, शिवसेना – 04, शिवसेना ठाकरे 07, काँग्रेस – 03, मनसे – 01, एमआयएम – 01
शिक्षण समिती (एकूण – 22) – भाजप -9, शिवसेना शिंदे – 03, शिवसेना ठाकरे – 06, काँग्रेस – 02, एमआयएम – 01
बेस्ट समिती (एकूण सदस्य 16) : भाजप – 06, शिवसेना शिंदे – 02, शिवसेना ठाकरे – 05, काँग्रेस – 02, एमआयएम – 01
