रविवारी मध्य रेल्वे मार्गावर मेगाब्लॉक, घरातून बाहेर पडताना वेळापत्रक पाहा….

मध्य रेल्वेच्या मुंबई विभागाने दिनांक ०२ ऑगस्ट २०२६ रोजी विविध अभियांत्रिकी आणि देखभालीची कामे करण्यासाठी मेन लाईनवर माटुंगा ते मुलुंड दरम्यान आणि हार्बर लाईनवर छत्रपती शिवाजी महाराज टर्मिनस ते चुनाभट्टी आणि वांद्रे स्थानकांदरम्यान मेगा ब्लॉक घेण्याची घोषणा केली आहे. त्यामुळे रविवारी घरातून बाहेर पडताना मुंबईकरांनी लोकलचे वेळापत्रक पाहूनच घराबाहेर पडावे असे आवाहन करण्यात आले आहे.

यामुळे प्रभावित होणाऱ्या फेऱ्या  खालीलप्रमाणे असतील:

मेन लाईन:

ब्लॉकचा कालावधी:

माटुंगा – मुलुंड स्थानकांदरम्यान ‘अप’ आणि ‘डाऊन’ जलद मार्गावर सकाळी ११.०५ ते दुपारी ३.४५ वाजेपर्यंत छत्रपती शिवाजी महाराज टर्मिनस, मुंबई येथून सकाळी १०.३६ वा.  ते दुपारी ३.१० वा. या वेळेत सुटणाऱ्या ‘डाऊन’ जलद मार्गावरील लोकल गाड्या माटुंगा येथून ‘डाऊन’ धिम्या मार्गावर वळवल्या जाणार आहेत. या लोकल गाड्या माटुंगा आणि मुलुंड स्थानकांदरम्यानच्या निर्धारित स्थानकांवर थांबतील आणि आपल्या गंतव्यस्थानी १५ मिनिटे उशिराने पोहोचतील. ठाणे येथून पुढे जाणाऱ्या जलद गाड्या मुलुंड येथून पुन्हा ‘डाऊन’ जलद मार्गावर वळवल्या जातील.

ठाणे येथून सकाळी ११.०३ वा. ते दुपारी ३.३८ वा. या वेळेत सुटणाऱ्या ‘अप’ जलद मार्गावरील लोकल गाड्या मुलुंड स्थानकावर ‘अप’ धिम्या मार्गावर वळवल्या जातील. या गाड्या मुलुंड आणि माटुंगा स्थानकांदरम्यानच्या निर्धारित स्थानकांवर थांबतील, माटुंगा येथून पुन्हा ‘अप’ जलद मार्गावर वळवल्या जातील आणि आपल्या गंतव्यस्थानी १५ मिनिटे उशिरा पोहोचतील.

हार्बर लाईनवर लोकल बंद

छत्रपती शिवाजी महाराज टर्मिनस – चुनाभट्टी – वांद्रे ‘डाऊन’ हार्बर लाईन:

सकाळी ११.४० वा. ते सायंकाळी ४.४० वाजेपर्यंत आणि

चुनाभट्टी – वांद्रे – छत्रपती शिवाजी महाराज टर्मिनस ‘अप’ हार्बर लाईन: सकाळी ११.१० ते सायंकाळी ४.१० वाजेपर्यंत

छत्रपती शिवाजी महाराज टर्मिनस, मुंबई येथून सकाळी ११.१६ वा. ते सायंकाळी ४.४७ वा. या वेळेत सुटणाऱ्या वाशी-बेलापूर-पनवेल येथे जाणाऱ्या ‘डाऊन’ हार्बर लाईनवरील लोकल गाड्या आणि सकाळी १०.४८ वा. ते सायंकाळी ४.४३ वा.  या वेळेत छत्रपती शिवाजी महाराज टर्मिनस, मुंबई येथून सुटणाऱ्या वांद्रे-गोरेगाव येथे जाणाऱ्या ‘डाऊन’ हार्बर लाईनवरील गाड्या रद्द राहणार आहेत.

पनवेल-बेलापूर-वाशी येथून सकाळी ९.५३ वा. ते दुपारी ३.२० वा. या वेळेत छत्रपती शिवाजी महाराज टर्मिनस, मुंबई येथे जाणाऱ्या लोकल गाड्या आणि गोरेगाव-वांद्रे येथून सकाळी १०.४५ वा. ते सायंकाळी ५.१३ वा.  या वेळेत छत्रपती शिवाजी महाराज टर्मिनस येथे जाणाऱ्या ‘अप’ हार्बर लाईनवरील लोकल ट्रेनच्या फेऱ्या बंद राहणार आहेत.

२० मिनिटांच्या अंतराने विशेष लोकल

ब्लॉकच्या कालावधीत पनवेल आणि कुर्ला (फलाट क्रमांक ८)  दरम्यान २० मिनिटांच्या अंतराने विशेष लोकल चालवल्या जातील. ब्लॉकच्या कालावधीत हार्बर लाईनवरील प्रवाशांना सकाळी १०.०० ते सायंकाळी ६.०० या वेळेत मेन लाईन आणि पश्चिम लाईन वरून प्रवास करण्याची मुभा असणार आहे.