मोठी बातमी! माजी आमदार अमरसिंह पंडित यांच्या हत्येचा कट? पीएच्याच दाव्यानं खळबळ, घटनास्थळी नेमकं काय घडलं?

मंगळवारी राज्यात नगर पंचायत आणि नगर परिषद निवडणुकीसाठी मतदान पार पडलं. जरी सर्वत्र मतदान शांततेत आणि सुरळीत पार पडलं असलं तरी देखील काही ठिकाणी गालबेट लागल्याच्या घटना घडल्या आहेत. बीड जिल्ह्यातून मोठी बातमी समोर आली आहे, ती म्हणजे बीड जिल्ह्यातल्या गेवराई तालुक्यात काल नगरपरिषद निवडणुकीसाठी मतदान सुरू असतानाच जोरदार राडा झाल्याची घटना घडली आहे.  गेवराईमध्ये काल नगरपरिषद निवडणुकीच्या मतदान प्रक्रियेदरम्यान दगडफेक, गाड्यांची तोडफोड आणि मारहाण करण्यात आल्याची घटना घडली आहे.  यादरम्यान माजी आमदार अमरसिंह पंडित यांच्या घरी जाऊन त्यांचे स्वीय्य सहाय्यक अमृत डावखर यांना बेदम मारहाण करण्यात  आली आहे. त्यानंतर आता अमृत डावखर यांच्याकडून या प्रकरणासंदर्भात खळबळजनक खुलासा करण्यात आला आहे.

नेमकं काय म्हणाले डावखर?  

माजी आमदार अमरसिंह पंडित यांच्या घरी जाऊन त्यांचे स्वीय्य सहाय्यक अमृत डावखर यांना बेदम मारहाण करण्यात आली. लाठ्या-काठ्या आणि बेल्टने मारहाण करण्यात आल्याची माहिती अमृत डावखर यांनी दिली आहे. एवढेच नाही तर बाळराजे पवार यांनी आपल्यावर हल्ला करण्यापूर्वी अमरसिंह पंडित यांच्या बाबत विचारणा केली, त्यांच्या खुनाचा कट रचूनच ते घरी आले होते, त्यांच्या हत्येचा कट रचण्यात आलेला होता, त्यांच्यासोबत काही अनोळखी लोक होते. माझा देखील जीव गेला असता, मात्र गाडी चालकाने मला सोडवलं. अशा प्रकारचा धक्कादायक दावा, अमरसिंह पंडित यांचे स्वीय सहाय्यक अमृत डावखर यांनी केला आहे. यासंदर्भात कठोर कारवाई करण्याची मागणी देखील त्यांनी केली आहे.

मारहाणीमध्ये डावखर गंभीर जखमी 

दरम्यान मंगळवारी ही घडना घडली आहे, मंगळवारी गेवराईमध्ये जोरदार राडा झाला. अमृत डावखर यांना बेदम मारहाण करण्यात आली आहे. ते या घटनेत गंभीर जखमी झाले असून, त्यांच्यावर सध्या बीड येथील एका खासगी रुग्णालयात उपचार सुरू आहेत. मात्र त्यानंतर आता डावखर यांनी केलेल्या दाव्यामुळे जिल्ह्यात खळबळ उडाली आहे.