नगरसेवक रमेश म्हात्रेंचं टेन्शन वाढलं; डोंबिवलीत 14 डॉक्टरांनी घेतला आक्रमक पवित्रा

डोंबिवलीतील डॉक्टर मारहाण प्रकरण चांगलंच तापलं आहे. डोंबिवलीच्या शास्त्रीनगर रुग्णालयात डॉक्टर सृष्टी बाविस्कर आणि वैभव सोळुंके यांच्यावर झालेल्या मारहाणीनंतर EMKAY एजन्सी आक्रमक झाली आहे. याच EMKAY एजन्सीमार्फत शास्त्रीनगरमध्ये मारहाणग्रस्त सृष्टी बाविस्कर आणि वैभव साळुंके सेवा बजावत होते. या घटनेनंतर एजन्सीने कल्याणच्या रुक्मिणीबाई आणि शास्त्रीनगर रुग्णालयातील 12 ते 14 डॉक्टरांनी काम थांबवलं आहे. पुरेशी सुरक्षा मिळाल्याशिवाय डॉक्टर कामावर रुजू होणार नाहीत, अशी ठाम भूमिका एजन्सीने घेतली आहे.

एजन्सीचे RMO जॉन फर्नांडिस यांनी आज शुक्रवारी KDMCच्या मुख्य अधिकारी दीपा शुक्ला यांची भेट घेत विविध मागण्यांचे निवेदन दिले. रुग्णालय परिसरात 24 तास पोलीस बंदोबस्त आणि डॉक्टरांच्या सुरक्षेची हमी देण्याची प्रमुख मागणी यावेळी करण्यात आली. मारहाणग्रस्त डॉक्टर सृष्टी बाविस्कर आणि वैभव सोळंके यांच्याशी एजन्सीचा सतत संपर्क सुरू आहे. ते सध्या केवळ संदेशांद्वारे भूमिका मांडत आहेत. दोन्ही डॉक्टरांनी अद्याप अधिकृतपणे राजीनामा दिलेला नाही. त्याबाबत कोणतीही अंतिम भूमिका जाहीर केलेली नाही. तर याबाबत मुख्य अधिकारी दीपा शुक्ला यांनी हा विषय आयुक्तांच्या निदर्शनास आणून दिला असून आवश्यक सुरक्षा उपलब्ध करून दिल्याचे सांगितले. ‘अद्याप कोणाचाही राजीनामा आलेला नाही. अधिकृत माहिती एजन्सीकडूनच मिळेल. डॉक्टर लवकरच सेवेत परततील अशी अपेक्षा आहे, असे दीपा शुक्ला यांनी स्पष्ट केले.

जॉन फर्नांडिस यांनी नेमकं काय म्हटलं?

एजन्सीचे RMO जॉन फर्नांडिस यांनी म्हटलं की, ‘आम्ही 24 तास सेवा बजावत असतो. आमचे महिला आणि पुरूष असे दोन्ही डॉक्टर सेवा बजावत असतात. त्यांना 24 तास सुरक्षा मिळाली पाहिजे. आमचे डॉक्टर अद्याप ऑन ड्युटी आहे. मारहाणग्रस्त डॉक्टरांचा राजीनामा आलेला नाही. ते घाबरल्याने त्यांनी नंतर राजीनामा देणार असल्याचे सांगितले किंवा पुन्हा सेवेत रुजू होऊ. त्यांच्याकडून अधिकृत माहिती हाती आलेली नाही. त्यामुळे सांगू शकत नाही. आम्ही त्यांच्या संपर्कात आहोत. त्यांना मानसिक त्रास झाला आहे. घटनेमुळे हॉस्पिटलला येण्यासाठी घाबरत आहेत. वारंवार घटना घडू लागल्याने डॉक्टर घाबरत आहेत. या घटनेमुळे डॉक्टरांना सुरक्षा मिळावी. शास्त्रीनगरमध्ये वारंवार अशा घटना घडत आहेत. डॉक्टरांनी 24 तास सुरक्षा मिळायला पाहिजे’.