निकाल लागताच भाजपचा एकनाथ शिंदेंना सर्वात मोठा धक्का, ठाण्यात मोठा ट्विस्ट; घडामोडींना वेग

ठाणे महापालिकेचा निकाल जाहीर झाला आहे. ठाणे महापालिकेत एकनाथ शिंदे यांच्या नेतृत्वातील शिवसेनेला घसघशीत यश मिळालं आहे. त्यामुळे शिंदे गटाचा महापौर होण्याचा मार्ग मोकळा झाला आहे. शिवसेनेच्या फुटीनंतरची ही पहिलीच निवडणूक होती. त्यामुळे या निवडणुकीत काय होणार? याकडे सर्वांचं लक्ष लागलं होतं. शिवसेना फुटीचा फायदा थेट भाजपला होणार असल्याचंही सांगितलं जात होतं. पण त्याचा काहीच फरक पडलेला दिसत नाहीये. या निवडणुकीच्या निकालानंतर भाजपने एकनाथ शिंदे यांना सर्वात मोठा धक्का दिला आहे. ठाणे महापालिकेत विरोधी बाकांवर बसण्याचा इशाराच भाजपने शिंदे यांना दिला आहे. त्यामुळे एकच खळबळ उडाली आहे. विशेष म्हणजे एकत्रितपणे निवडणूक लढवल्यानंतर भाजपने हा इशारा दिल्याने चर्चांना उधाण आलं आहे.

ठाणे महापालिकेच्या 131 जागांपैकी शिंदे गटाला 75 तर भाजपला अवघ्या 28 जागा मिळाल्या आहेत. या निवडणुकीत भाजप आणि शिवसेनेची युती होती. तरीही भाजपला अपेक्षित यश गाठता आलेलं नाही. मात्र, निवडणूक संपताच भाजपने वेगळी भूमिका घेण्याचा विचार सुरू केला आहे. योग्य मानसन्मान न मिळाल्यास आम्ही वेगळा विचार करू, असा इशाराच भाजपचे आमदार संजय केळकर यांनी दिला आहे. केळकर यांच्या या इशाऱ्याने एकच खळबळ उडाली आहे. त्यामुळे भाजप आणि शिवसेनेची युती ठाण्यात तुटणार असल्याचे संकेत मिळत आहेत.

सत्तेवर अंकूश हवा

योग्य मान सन्मान न मिळाल्यास वेगळा विचार करू. वेळ पडल्यास विरोधी बाकावर बसू , असं सूचक विधान संजय केळकर यांनी केलं आहे. आम्ही वेगळ्या पद्धतीने विचार करू शकतो. सर्वांच्या कामकाजाकडे त्यामुळे लक्ष दिलं जाऊ शकतं. सत्तेवर अंकुश ठेवणे महत्वाचे असते, त्यामुळे आम्ही वेगळा विचारू करू, असंही केळकर म्हणाले. तर निवडणुकीत आम्ही जी जी आश्वासने दिली आहे. ती पूर्ण करण्याची जबाबदारी आमची आहे, असं भाजपचे आमदार निरंजन डावखरे म्हणाले.

प्रेशर टॅक्टिस ?

दरम्यान, महापालिकेत शिंदे गटाला स्पष्ट बहुमत मिळालं आहे. त्यामुळे पालिकेत शिंदे गटाची संपूर्ण सत्ता आली आहे. अशावेळी आपल्या पदरात उपमहापौरपद, सुधार समितीसह इतर काही समित्या पाडून घेण्यासाठी भाजपकडून ही प्रेशर टॅक्टिस सुरू केल्याचं म्हटलं जात आहे. त्यामुळे शिंदे भाजपच्या या इशारा आणि प्रेशर टॅक्टिसला जुमानतात का? याकडे सर्वांचं लक्ष लागलं आहे. दुसरीकडे भाजप विरोधी बाकावर बसल्यास शिंदे गटाची मोठी डोकेदुखी वाढण्याची शक्यताही वर्तवली जात आहे.