बामणोली ड्रग्ज प्रकरण तापलं, हर्षवर्धन सपकाळांच्या गौप्यस्फोटानंतर आता शुभराज देसाई मैदानात, दिला मोठा इशारा

राजकीय वर्तुळातून मोठी बातमी समोर येत आहे, एकनाथ शिंदे यांच्या शेताशेजारी ड्रग्जची फॅक्टरी सापडल्याचं काँग्रेसचे प्रदेशाध्यक्ष हर्षवर्धन सपकाळ यांनी म्हटलं आहे. माजी मुख्यमंत्री आणि सध्याचे जे उपमुख्यमंत्री एकनाथ शिंदे जे आहेत, ते त्यांच्या शेतात जातात, त्या शेताच्या शेजारी एक ड्रग्जची फॅक्टरी सापडली आहे. या फॅक्टरीमध्ये 42 लोक होते, त्यामध्ये दोन जणांना पकडलं. बाकीचे कुठले होते, बांग्लादेशी होते की, आणखी कुठले होते ते माहीत नाही. या आरोपींना सोडण्याकरता थेट उपमुख्यमंत्री कार्यालयातून व्हाया मुख्यमंत्री फोन गेले होते, असा गौप्यस्फोट हर्षवर्धन सपकाळ यांनी केला आहे. दरम्यान पुढे बोलताना ते म्हणाले की ते एरवी लुटुपुटूच्या लाढाया करतात. मात्र अशा प्रकारची कॅलॅमिटी आल्यानंतर ते तिघे पुन्हा एकत्र होतात, हा त्यांचा स्वभाव आहे. त्यामुळे या प्रकरणामध्ये शिंदे सेनेचा हात असल्याची शंका आहे, ती चुकीची नाही, असं यावेळी हर्षवर्धन सपकाळ यांनी म्हटलं आहे.

दरम्यान काँग्रेसचे अध्यक्ष हर्षवर्धन सपकाळ यांनी ड्रग्ज प्रकरणात केलेले सर्व आरोप हे बिनबुडाचे आहेत, असं मंत्री शंभूराज देसाई यांनी म्हटलं आहे. चौकशीनंतर कारवाई करणार असा इशाराही यावेळी शंभूराज देसाई यांनी दिला आहे. बामणोली ड्रग्ज प्रकरणातील आरोप हे निराधार आहेत, असंही ते यावेळी म्हणाले आहेत.

 नेमकं काय म्हणाले शंभूराज देसाई 

यामध्ये जे कोणी दोषी असतील, ते दोषी सापडतील, पोलीस त्याचा तपास करतील. पोलीस या प्रकरणाच्या मुळाशी जातील. मीडियामध्ये चमकण्यासाठी हर्षवर्धन सापकाळ यांच्याकडून हे निराधार आरोप करण्यात येत आहेत. एकनाथ शिंदे यांचं नाव घेतलं किंवा त्यांच्या कार्यालयाचं नाव घेतलं की हर्षवर्धन सपकाळ यांचा चेहरा दिवसभर मीडियामध्ये दिसणार. अन्यथा त्यांचा चेहरा तसाही महिना महिना मीडियावर दिसत नाही. कारण त्यांचं काही कामच नाही ना, त्यामुळे आपला चेहराही दिसावा यासाठी चालेली ती त्यांची धडपड आहे, असं यावेळी शंभूराज देसाई यांनी म्हटलं आहे.