३ नवजातांच्या मृत्यू प्रकरणी सरकार अॅक्शन मोडमध्ये; दोषींवर होणार कारवाई, आरोग्यमंत्र्यांनी दिली महत्वाची माहिती

अमरावतीच्या जिल्हा स्त्री सामान्य रुग्णालयामध्ये व्हेंटिलरच्या स्फोटाच्या आगीत 3 नवजात शिशूंचा होरपळून मृत्यू झाल्याची घटना घडली आहे. तीन नवजातांच्या मृत्यूने संपूर्ण महाराष्ट्र हळहळला आहे. या प्रकरणातील दोषींवर कठोर कारवाईची मागणी केली जात आहे. या घटनेवर आता आरोग्यमंत्री प्रकाश आबिटकर यांची पहिली प्रतिक्रिया समोर आली आहे. ३ नवजातांच्या मृत्यू प्रकरणाची चौकशी करून कारवाई केली जाईल, असे मंत्री प्रकाश आबिटकर यांनी सांगितले.

दुर्दैवाने तिघांना वाचवता आलं नाही – आबिटकर  

अमरावतीमधील घटनेची माहिती घेतल्यानंतर मंत्री आबिटकर म्हणाले, ‘ अमरावतीमध्ये स्फोट झाला की शॉर्ट सर्किट झाला, हे स्पष्ट व्हायचं आहे. रुग्णालयातील सर्व कर्मचाऱ्यांनी बाळांना वाचवण्याचा प्रयत्न केला. कर्मचाऱ्यांनी जीव धोक्यात घालून नवजातांना वाचवलं. दुर्दैवाने तिघांचा मृत्यू झाला. या बालकांना वाचवता आले नाही. दुर्घटनेनंतर काहींना इतर रुग्णालयात दाखल करण्यात आलं आहे. काही खासगीमध्ये आहेत. तर काही सरकारीमध्ये आहेत. त्यांच्यावर उपचार सुरू आहेत. ते आता सुरक्षित आहेत. दुर्दैवाने तिघांना वाचवता आलं नाही, असेही त्यांनी सांगितले.

आरोग्य मंत्री आबिटकर अमरावतीत पोहोचणार 

‘घटना साडेतीन वाजता घडली. मी दुपारपर्यंत घटनास्थळी पोहोचणार आहे. आमचे सर्व अधिकारी पोहोचणार आहे. पालकांची भेट घेणार आहेत. मुख्यमंत्र्यांची परवानगी घेऊन जाणार आहोत, असेही ते पुढे म्हणाले. दरम्यान, आरोग्यमंत्री दुपारपर्यंत अमरावतीमध्ये पोहोचणार आहेत. त्यांच्यासोबत आरोग्य सचिव डॉ. निपुण देखील असणार आहेत. घटनास्थळी पोहोचून या संपूर्ण घटनेची माहिती घेतील.

घटनेनंतर नवनीत राणा आक्रमक

अमरावतीच्या जिल्हा स्त्री सामान्य रुग्णालयामध्ये व्हेंटिलरच्या स्फोटाच्या आगीत 3 नवजातांच्या मृत्यूनंतर माजी खासदार नवनीत राणा यांनी रुग्णालयाची पाहणी केली. दोषींवर खुनाचा गुन्हा दाखल करा, अशी मागणी नवनीत राणा यांनी केली. रुग्णालयातील अग्निशामक यंत्रणेवर ही नवनीत राणां यांनी सवाल केला. फायर ऑडीट झालं होतं की नाही, याची माहिती नवनीत राणा यांनी मागितली. पाहणी केल्यानंतर नवनीत राणा यांनी फोनवरून आरोग्य मंत्री प्रकाश आबिटकर यांच्याशी संवाद साधला.