रस्ते आहेत तर अपघात होणारच, चिमुरड्याच्या मृत्यूनंतर भोरचे आमदार शंकर मांडेकर यांचे भयंकर वक्तव्य

भोरचे आमदार शंकर मांडेकर यांनी भयंकर वक्तव्य केले आहे. रस्ते आहेत तर अपघात होणारच असे निष्ठूरपणे आमदार शंकर मांडेकर यांनी म्हटले आहे.पुणे महापालिका हद्दीतील म्हाळुंगे-नांदे रस्त्यावरील खड्ड्यांमुळे झालेल्या भीषण अपघातात रिषभ पाटोळे या चिमुकल्याचा ट्रकच्या चाकाखाली चिरडून दुर्दैवी मृत्यू झाला. त्यावर पत्रकारांनी याची जबाबदारी कोण घेणार असा सवाल केला असता राष्ट्रवादी काँग्रेसचे आमदार शंकर मांडेकर यांनी हे चिड आणणारे वक्तव्य केले आहे.

पुणे महापालिका हद्दी म्हाळुंगे – नांदे रस्त्यावर खड्ड्यांमुळे झालेल्या भीषण अपघातात रिषभ पाटोळे या चिमुकल्याचा ट्रकच्या चाकाखाली चिरडून दुर्दैवी मृत्यू झाला होता. या प्रकरणात ट्रकचा कोणताही थेट धक्का लागलेला नसतानाही केवळ ट्रक चालकावरच बावधन पोलिसांनी गुन्हा दाखल केला आहे. यामुळे चोर सोडून संन्यासाला फाशी दिल्याचा प्रकार घडला आहे. रस्त्याची चाळण करणाऱ्या जबाबदार अधिकारी आणि यंत्रणांवर कोणतीही कारवाई न झाल्याने पोलिसांच्या भूमिकेवर प्रश्नचिन्ह उपस्थित होत आहे. दरम्यान, घटनेनंतर स्थानिक आमदार शंकर मांडेकर यांनी घटनास्थळाची पाहणी केली असता त्यांना संतप्त नागरिकांच्या प्रचंड रोषाला सामोरे जावे लागले. त्यांनी याप्रकरणात मुख्यमंत्र्यांची भेट घेण्याचे आश्वासन दिले.

आमदार काय म्हणाले नेमके ?

रोड आहेत तर अपघात होणार आहे. ज्याची मोठी गाडी आहे त्याच्यावर गुन्हा दाखल होतो असे असंवेदनशील वक्तव्य आमदार शंकर मांडेकर यांनी पत्रकारांशी बोलताना केले. त्यावेळी त्यांनी पत्रकाराला एकेरी भाषेत तु पत्रकार आहे तर मी जबाबदार आमदार आहे असेही म्हटले. अपघात झाल्यावर गाडी चालकावर गुन्हा दाखल होत असतो. होऊ नये पण काय करणार ? मी काय आवाज उठवत नाही. तुम्ही आज मला प्रश्न विचारताय, मी दोन वर्षे सभागृहात आवाज उठवत आहे. माझ्या उपस्थितीचे कार्ड दाखवू का ? असेही आमदार मांडेकर पत्रकारांना म्हणाले. शेवट गर्व्हमेंट आहे मी तरी काय करणार त्याला असे म्हणत त्यांनी एकप्रकारे हात वर केल्याने संताप व्यक्त होत आहे.

ही बातमी आताच ब्रेक झाली आहे. या बातमीला आम्ही अजुनही अपडेट करत आहोत. तुम्हाला सर्वात आधी माहिती पोहोचवण्याचा आमचा प्रयत्न आहे. त्यामुळे ह्या पेजला रिफ्रेश करत चला. तसेच आमच्या इतर स्टोरीज वाचण्यासाठी इथं क्लिक करा.